Ректоратрал барча унни Сулайман АхIмадов

Ректоратрал барча унни Сулайман АхIмадов

Ларгсса нюжмаркьини Дагъусттаннал паччахIлугърал ректоратрал барча унни сайки щалва оьрмулий университетраву информацион технологиялул элмулухагу зий, студентътуран информатика лахьхьин дуллалисса, ЦIущанниятусса техникалул элмурдал доктор, профессор, АьбдурахIимлул арс Сулайман АхIмадов. Май зурул 25-нний ванан 75 шин хьуссар.

Университетрал ректор Муртазааьли Рабадановлул, ва барча уллай, кIицI лавгунни ванал университетраву зий 45 шин хьуну душиву, миннувагу информатикалул ва информацион технологиярттал проректорну 14 шин дуршиву, кафедралул хъунаману – 25 шин. Бувсунни ва Интернет центрданул хъунаманугу, цIуну тIивтIусса факультетрал деканнугу, ректорнал маслихIатчинугу ивкIшиву, циняв къуллугъирттай ванал цува бюхъу бусса каялувчигу, аьлимчугу ушиву ккаккан бувшиву. Ректорнал бувккунни Сулайман АьбдурахIимовичлун барчаллагь баян буллалисса приказгу.

Юбиляр барча уллалисса ихтилатру буллай, проректортурал МахIаммад ХIасановлул, Назир Аьшурбековлул, Назирхан ХIажиевлул кIицI лавгунни цивппа мудангу гъирарай зий бикIайшиву Сулайман АьбдурахIимовичлущал, ванащал архIал дунияллул халкьуннал дянивсса конференциярттайгу гьуртту хьушиву, уртакьну тамансса давурттив дуршиву. Бувсунни ванаяту цанма чIявусса затру лавхьхьушиву, гьарца чулуха оьвхъусса, хIал бавкьусса зунтталчу ушиву.

Аьрасатнал ПаччахIлугърал Думалул депутат Аьбдулмажид МахIрамовлул кIицI лавгунни Сулайман АхIмадовлуйхчIингу цIакь хьушиву 2-ЦIувкIуллал ва ЦIущаннил жяматрал дусшиву, давривугу, оьрмулувугу хIал бавкьусса Сулайман уттиния тинайгу кIирагу шяраваллил ттарцIнугу, жагьилтурансса насихIатчинугу икIантIишиврий цува дакI дарцIуну ушиву.

МахIачкъала шагьрулул мэрнал маслихIатчи Шалласу Шалласуевлул бувсунни ЦIущанниятусса АхIмадовхъал ва Маммаевхъал ( ва Сулайманнул кулпатрал Маяхалумлул ляхъинни) кулпатирттал Ккуллал райондалул оьрму хьхьичIунмай хъит учин бувавриву биялсса бутIа бивхьушиву, хаснува дуккин бавриву. Бувсуна Сулайман АхIмадов мачча-гъанцириннан , дустуран, кIулцириннан пахрулунсса аьлим­чу ушиву.

Юбиляр барча уллалисса шадлугърай ихтилатру бувна цаймигу даврил уртакьтурал ва хъамаллурал. Вайгу Сулайман АхIмадовлул ххуй-ххуйсса давурттайну шяраваллил ва миллатрал цIа гьаз дуршиврий, цува авцIусса кIану чIюлу буллалисса чув ушиврий, сий дусса аьлимчу ва преподаватель ушиврий чIурчIав дуллай бия.

Аватар

Патимат Рамазанова

Заслуженный работник культуры РД

Читайте также: