Ларгсса тталаткьини республикалий коронавирус ппив хьун къаритавриха зузисса Оператив штабрал ирглийсса заседание хьунни. Ва дачин дурну ия Дагъусттаннал БакIчинал кIанттайсса Сергей Меликов.

Ванал бакIрайва кIицI лавгунни республикалий ковидрацIун дархIусса тагьар цIунилгу къаххуйсса душиву, ялу-ялун гьарза хъанай бушиву азар дирми ва азарханардай утту бишин бувми. Бувсунни хIакьинусса кьини азарунниха ливчусса инсантал азарханардай хъин хъанай бушиву, май зуруйсса байранну ва хъатIив сававну, коронавирус цIалхъанну ппив хъанахъисса тагьар душиву. Сергей Меликовлул, дукIура куннасса тагьар тикрал къахьуншиврул, маслихIат бунни вакцинарду буваврил даву дири дуккан дуван.

Республикалул Минздрав вакциналул даву дуллай бур, амма даврил бущи дири буккан бувангу багьлай бур, кIани-кIанттурдай муния хайр бушиву бусласаврил давугу гужлан дуван багьлай бур. «ХIакьину республикалий вакцинарду бувну бур ттуршазарунниха ливчу­сса инсантурал, ми хъанахъи­ссар 7, 4 % инсантурал. Цайми регионнай вакцинарду бувминнал аьдад хъунни. Билаятрайсса хIасиллу хIисавравун ларсун, жува махънин багьну буру. Вакцинарду буваврил даву лащинсса даражалий ду­сса районнал хъуними къуллугърая мурахас бувансса пикри бур уттисса заседаниялий.

Миннан агьалинал цIуллушиву дуруччин къахъанай буру тIисса аьрзарду чичин багьантIиссар, жува Аьрасатнаву вакцинарду буваврил ккал-аьдад хIисавравун ларсун 85-мур кIанттай буру», – увкунни Меликовлул. Ванал тапшур бунни вакцина баврил даву сантирай ва лябуккулий дуллан. ЦIуллу- сагъшиву дуруччаврил министрнал хъиривчу Салман АхIмадовлул бувсмунийн бувну, вакцина бувайсса 86 стационар пунктру ва 47 мобильный­сса бригадартту хIасул бувну бусса бур республикалий хIатта бигьалагай кьинирдайгума зузи­сса. Роспотребнадзорданул Да­гъусттаннаймур управлениялул хъунама Николай Павловлулгу бувсунни Дагъусттаннай зунттал районнайгу азар ппив хьусса кIанттурду бушиву, мунил сававгу шагьрурдайсса чIявусса инсантал ккучунну дурну хъатIайн, бивкIурдайн шяраваллавун занай бушиву душиву.