Дагъусттаннал БакIчинал буржру чIумуйну биттур буллалисса Сергей Меликовлул «Лезгинка» ансамбльданун дуллунни республикалул халкьуннал культуралул ирсирал багьлул ляличIинува лавайсса объектрал статус. Хасъсса хIукмулий бакIчинал къулбас дунни июньдалул 8-нний.

«Постановляю отнести государственное бюджетное учреждение «Академический заслуженный ансамбль танца Дагестана «Лезгинка» к особо ценным объектам национального культурного достояния народов Республики Дагестан», – куну бур му хIукмулий.
ДР-лул «О культуре» тIисса 24-мур Закондалул статьялийн бувну, Дагъусттаннал халкьуннал культуралул ирсирал багьлул ляличIинува лавайсса объектирдал сияхI ккаккан дувайссар республикалул бакIчинал.

«Лезгинка» ансамбль сакин дурссар сентябрь зуруй 1958 шинал. Мунил гьану бивзссар СССР-данул халкьуннал артист Танхо Израиловлул. Муния шийннай ва ансамбль дирну дур дунияллул 65 билаятрайн, ххув хьуну дур фольклорданул къавтIаврил пишакарсса коллективирттал дянивсса 48 фестивальданий.