Оьрмулул 15 шинаву ва гьуртту хьуну ур Севастополь мурахас буллалисса талатавриву
Май зурул 9-нний, гьамин Ххувшаврил кьини, 100 шин хьунтIиссия Ххутрал шяраватусса генерал-майор, уттизаманнул коммуникациялул технологиярттал патриарх, Аьрасатнал телекоммуникациярдал сетирдал генеральный конструкторну зий ивкIсса, жулва билаятрай связьрал система гьаз дувавриву биялсса бутIа бишаврицIун, цал архIал шанма билаятрал ( Азирбижаннал, Арманинал ва Гуржиял) лайкь хьусса связист, Абакардул арс Ися ПирмахIаммадовлун.
Вава май зурул 3-нний 2007 шинал лавгун ур цувагу дунияллия. Ванал оьрчIшиву ва жагьилшиву ларгун дур ппу хIалтIухъанну зузиссса Севастополлай. Тиккува къуртал бувну бур школа. Оьрмулул 15 шинаву гьуртту хьуну ур Севастополь тархъан буллалисса талатавурттавух. Ккавккун бур Севастополь немецнахьхьун къагьан кьянкьану бавцIусса вирттал. Дагъусттаннайн зана хьуну, 1948 шинал къуртал бувну бур Гъумук педагогикалул училище, Лакрал ва ЦIуссалакрал школарттай зий ивкIун ур учительну. Амма Севастополлал вирттал дакIния къалагайсса ванал аьрали училищалувун дуклан уххансса хиял къакьабивтун бур. Увххун ур Ульяновск шагьрулийсса Связьрал аьрали училищалийн. Ва къуртал бувайхту, Сахалиннайн агьну ур, арулла шинай къуллугъ бувну бур ПВО-лул частьраву, паччахIлугърал дазурду ядуллай. Тания махъ Ленинградуллал связьрал аьрали академиягу къуртал бувну, зий ивкIссар связьрал аьралуннал хъунама инженернал къуллугърайн ияннин. Связьрал даву гьаз дуллалисса ванал 15 цIушинна Аьрасатнал ва кьатIаллил билаятирттал армиярттай ишла дуллай бивкIун бур. Ва хIисав хъанай ур ПВО-лул аьралуннал тропосфералул связьрал гьану бивзману. 1975 шинал Исян дуллуну дур генерал-майорнал цIа, вара шинал СССР-данул Электротехприборостроениялул министерствалийн связьрал центрданул директорну зун оьвкуну бур. Ванал хIарачатрайну 48 шагьрулийсса заводру ччясса мутталий связьрал дузал бувну бивкIун бур.
1993 шинал Ися зун айивхьуссар Аьрасатнал телекоммуникациярдал сетирдал генеральный конструкторну ва паччахIлугърал лицензия дусса связьрал циняв журардал проектирдалсса буллай ивкIссар. Ванал каялувшиврийну 1998-2000 шиннардий Свердловскаллал, Новосибирскаллал ва цаймигу областирдал, мукунма Дагъусттаннал Национал банкрал связьрал сетирдал проектру бартдиргьуссар. Аьрасатнал ва СНГ-лул ччимур билаятрай связьрал даврий каялувшиву дуван ихтияр дуллалисса сертификатрал заллу ивкIссар Ися ПирмахIаммадов.
Цалва бюхъу-хIарачат ишла бувну, дугу-дурссар ванал тарихраву яргсса цIа личIансса давуртту. Миннувух 1993 шинал Дагъусттаннай ванал хIасул дурну диркIссар цифровой системалул сеть (АО «Махачкала») ва республикалий цалчин зузи дурссар транковая связь. Ися зий ивкIсса циняв къуллугъирттал цIарду кIицI лаган къахьунссар, амма кIицI къалавгун битан къахьунссар ва Бакуйннал аьрали округрал ПВО-лул хъунаманал хъиривчуну ивкIшиву, Афгъанисттаннай тайннал ярагъуннил гужирдал генштабрал хъунаманал хъиривчунал маслихIатчину ва СССР-данул Минобороналул связьрал хъунаманал маслихIатчину ивкIшиву. Ися ПирмахIаммадовлул бюхъу-гьунарданун ва захIматран лайкьсса кьимат бивщуну бур хIукуматралгу . ЯтIул Ттугълил ва Дусшиврул орденнугу дур ванал наградарттавух. Исял оьрмулул хIакъиравусса информация батIин кумаг бувсса Москавуллал «Дагъусттан» Культуралул центрданул каялувчи Арсен ХIусайновлул бувсунни Ися кIицI лавгсса центрданул Ветерантурал советрал членнугу ивкIшиву, чялишну хIала уххайсса ивкIшиву дуллалицири давурттавухгу. Бувсунни Дагъусттаннал жагьилтал патриот зумуну тарбия бувавривугу ванал биялсса бутIа бушиву.
