Щалагу Аьрасатнаву кунма, Лакрал райондалий­сса ГьунчIукьатIрал шяраваллил школалийгу бивщунни Махъва-махъсса гюнгутIи. Школалий дуллалисса цайми-цайми щадлугъру кунна, Махъва-махъсса гюнгутIулмур шадлугъгу хьунни ларайсса сакиншиндарай, выпускниктуран ва бавтIсса цинявннаннагу дакIний личIанну.

Шадлугърайсса батIаву дайдихьлай, выпускниктал барча буллалисса, миннан гихуннайсса дуккавриву тIайлабацIу чIа тIутIисса ихтилат бувна школалул директор Къушиев Маликлул. Махъру ялагу лавхъуна райондалул администрациялул вакил Дандамаев КьурбанмахIаммадлул, выпускниктурал нитти-буттал ва ттатта-бавахъал, 11-мур класс­рал выпускниктурал цалчин­сса учительница Кьурбанова Бадрижатлул ва 9-мур классрал выпускниктурал цалчинсса учительница Дандамаева Асиятлул, кIивагу классрал каялувчитурал. Выпускниктурал, цинявппагу учительтуран тIутIал кацIругу буллуну, ккаккан дунни авадан­сса ва мяъна-мурадрал дурцIусса программа. Увкунни школалухасса балайрду ва дур­ккунни назмурду, миллатирттал яннардаву ккаккан дунни къавтIавуртту, сценкартту.

Гьашину ГьунчIукьатIрал школалий 11-мур класс къуртал буллай 1 оьрчI ва 1 душ бур – Къарагишиев ХIасан ва Юсупова Сакинат. Вайннал классрал каялувчину бур Къушиева Анисат. ХIасан ур математикалул чулуха гуж бусса, ванал пикри бур ДГУ-лул информатикалул факультетрайн уххансса. Сакинат, ххуйсса дуккаврицIун, балай учаврил ва къавтIун бизаврил хIарачат бусса душ бур. Ва пикрилий бур логопед хьунсса. Вайннан хъинну ххирар буттал кIанугу, лакку мазгу, ниятгу дур, цалва язи бувгьусса пишардугу кIунттил бувгьуну, ларайсса кIулшивурттугу ларсун, буттал шяравун зана хьунсса.

ГьунчIукьатIрал дянивмур даражалул школалий 9-мур классраву бур 5 оьрчI: 3 душ ва 2 оьрчI – ХIажиева Бадружинан, Сулайманова Аймисай, Парханова ПатIимат, МахIаммадов Нураттин ва Кьурбанов ХIажимурад. Ва классрал каялувчину бур Аьлие­ва Роза. Классравусса шанмагу душ дуклай бур марцIсса ххювардай, хьхьичIунсса гьурттушинна дуллай бур школалул жяматийсса оьрмулувугу. Бадружинаннул хиял бур хIакин хьунсса. Ванил бур пасихIну назмурду дуккаврил гьунаргу. Бадружинаннул ва шинал лакрал литературалул республикалул олимпиадалий 1-мур кIану бувгьуссар.

Аймисайл хиял бур архитектор хьунсса. Гьашину тарихрал олимпиадалий гьуртту хьуну, райондалий хьхьичIунсса кIану бувгьуссар.
ПатIимат гьашину райондалий правалул олимпиадалул призер хьуссар. Ванил хиял бур юрист хьунсса.
Нураттин ва ХIажимурадгу школалул оьрмулул иширттавух хьхьичIунну гьуртту хъанахъи­сса, хIарачат бусса, спортраву итххявхсса оьрчIру бур.
Ва кьини выпускниктурал чулухунмайсса цинявппа махъругу, чIа учавурттугу дия, хьхьичIунну ЕГЭ-рдугу, ОГЭ-рдугу дуллуну, цалва язи бувгьусса ххуллурдай тIайлабацIу шаву, цивппа чув бунугу, буттал шяравалугу, ни­ттил мазгу, аьзизсса школагу хъамакъабитаву.