Буттал КIанттул цIанийсса Хъунмасса дяъвилий Ххувшаву ларсун 76 шин шаврил байрандалул хъунмур шадлугъну хьунни Каспийскалий аьралуннал парад даву. Муний гьуртту хьунни Дагъусттаннал БакIчи Сергей Меликов.
[dropcap]М[/dropcap]айрал 9-нний шагьрулул хъунмайданнив чIявусса халкь салкьи хьуна. Бусравсса хъамаллуравух бия ветерантал .
Каспийскалий Ххувшаврил Парад тIиртIунни Каспийскаллал флотилиялул хьхьирил бахьттагьалтрал хIаписартурал ттугълищалсса кьюкьлул. МахIачкъалаллал горнизондалул аьралуннал парадрал каялувчину ия Каспийскаллал флотилиялул хъунаманал хъиривчу Сергей Екимов.
Парад кьамул дуллай ия Каспийскаллал флотилиялул хъунама контр-адмирал Александр Пешков.
Ца минутIрайсса пахъбагьаву баян бувну махъ дагъусттанлувттурахь бюхттулсса Ххувшаврил кьини барча дунни Республикалул каялувчи Сергей Меликовлул: «Ва жула билаятрал бюхттулсса байранни, муниву дур дакIнийхтунусса ххаришивугу, лекъащайсса бюхттулсса цIагу, ахир дакъасса хIасратгу.
[dropcap]В[/dropcap]а байрандалул тарихравусса мяъна чIун наниссаксса даххана хъанай дакъар, жулва буттахъал ва ттаттахъал гьунардан бивщусса кьиматгу баххана буван къашайссар.
Жура бакIру лахIан дуллалиссару дяъвилул чуллай жанну кьурван дурминнал ва, жанну хIайп къадурну, дяъвилул къинттулух захIмат буллай бивкIминнал аьпалул хьхьичI.
180 азаруннаха ливчусса дагъустанлувтал талай бивкIссар Хъун дяъвилул фронтирттай. Миннавату гьарца кIилчинма оьрмулуцIа хьуссар жула Ватандалул тархъаншиврул цIаний.
ЛивтIусса вирттаврал аьпа абад хьуннав.
Зул цIа бюхттул хьуннав, ххув хьусса вирттал, бюхттул хьуннав фашистътал ххит буккан бувсса чIявумиллатру бусса халкьуннал цIа!
Барча байран! Барча Бюхттулсса Ххувшаврил кьини!».
Аьрасатнал Федерациялул ПаччахIлугърал гимналухун дурунни артиллериялул салют. Яла дурунни парадгу.
