Пагьламантурал мастер-класс

Дагъусттаннал паччахIлугърал университетраву, Планетарийлул хьхьичIсса майданнив, Космонавтикалул кьинилун хасну, 1-мур ЦIувкIратусса МухIаммад Юнусовлул ва Камил Маммаевлул ккаккан бунни хьхьуттайх лахъаврил мастер-класс.

– ХIакьину Дагъусттаннал агьалинал халкьуннал культура, магьирлугъ, миллатрал маз ва ляличIишиву ядаврих хъуннасса къулагъас дикIан аьркинни, дагьайкунсса къулагъас къадуварча, жулва рувхIанийсса ирс-ххазина бухлаган бюхъайшиву аьлтта чIалайгу бухьувкун.

Ва мурадрай, жун дакIнийн багьунни жулла шяраваллил, ЦIувкIуллал, хьхьуттайх ла­хъаврил магьирлугъ студентътуран ккаккан дуван, щаллагу дунияллийх машгьур хъанахъисса слеклайн (тараза канил къадургьуна хьхьуттайх лахъаву) журалийсса, – увкунни ЦIувкIуллал фондрал вакил МухIаммад Юнусовлул. Ва цувагу шагьрулий увсса ва хъуна хьусса ухьурчагу, ппухълуннал мина ххирасса, сант дириярча, Лаккуйнай анавар уккайсса, шяраваллил оьр­мулуву хъанахъисса иширттавухгу чялишну хIала уххайсса чув ур. Цала даву ххуйну кIулсса, Дагъусттаннай чIявуссаннан кIулсса юристри цувагу. Камил Маммаевма ЦIувкIуллал хьхьуттайх лахъултрал цIа духлаган къаритан хIарачат буллалисса жагьил ур. Ряххилчинмур никирайсса пагьламанни цувагу. «ОьрчIнийва хьхьуттайх лахълай айишайхтува ттувун цIувкIуллал магьирлугъ духлаган къаритан аьркинни тIисса пикрирду був­ххуна, ттущава шаймур буллайгу уссияв, пагьламантурал ирс уттигу хьхьу­ттай гьунарду буллай бушиву кка­ккан буван.

Махъ ппурттуву на слеклайн журалухун агьра, дунияллийсса жагьилтураву ванил сий гьаз хъанай дунавхьур. Ттун цIувкIуллал искусст­во духкъалаган хIукуматралгу кабакьу бувну ччива»,– увкунни ванал. Бусанна ванал Хъунзахъиял райондалийсса Цолотль каньондалул ялтту 150 метралул лахъну хьхьуттайх лахълахъи­сса видеосюжет социал сетирдай машгьурну душиву ва централ телевидениялийгума кка­ккан дуршиву. « Дахьва хьхьуттай гьунарду буллан лахьхьаву къагьассар, ттун мудангу цIусса номер ккаккан буван ччан бикIай, тамашалийн бавтIми хIайран буваншиврул. Бур бартбигьин ччисса хияллу, цIувкIуллал искусство цIулаган дувансса мурадгу. Так хIукуматралгу нара дуллалимуницIун кабавкьуну ччива, шагьрурдайсса оьрчIангу хьхьуттайх лахъаврил магьиршиву лахьхьин дуллан хьун­ссия», – тIий ур Камил. Цалчин­мур ЦIувкIуллал шярава увккун ур 18 Да­гъусттаннал ва Аьрасатнал халкьуннал ва Дагъусттаннал ва Аьрасатнал лайкь хьусса артист. Пагь­ламантурал династиярду дур. ЦIанихсса пагьламантурал наслулул варис Камил Маммаевгу хIакьину шяраваллил цIа-кьини яданмур буллай ур. ЦIу-цIусса лахъазанну хьхьуттайх лахълай мютIи дуллай.

Патимат Рамазанова

Заслуженный работник культуры РД

Читайте также: