Ва мубараксса Рамазан зуруй, май зурул мяйнний, лакрал агьали батIинтIий бур зумаритаврил урцIухуннугу, Редукторный посёлокрай цIуну буллалисса МухIаммад Идавсил (с.аь.с) цIанийсса мизитравун. Ва даврил сиптачитал бур чIявусса агьали бавтIсса мажлис буван хIадур хъанай. Ва анжагъ зумаритаврил ссупралухун батIаву дакъар, микку мюнпатсса, агьамсса ихтилатирттахгу, илкинсса майданнив личIинува ххуйну экьи нанисса нашидирттахгу вичIи дишин хьунтIий бур.

– Жул ва мероприятие ххуй­сса даражалий дувансса ният дуссар. ЧIявусса инсантал цачIун бавтIун, зума итадакьавугу ххуйшивур, укунсса давурттал инсантурал дакIру гъан-мачча дуллалиссар, – тIий ур Муфтиятрал вакил Шамил БахIандаьлиев.
Ванал бувсунни, мукунма, ялун букIлакIими кьамул буллай, щябитлай, дукия ва хIачIия дачIлай волонтёртал бикIантIишиву, уттива мигу, лак­рал активистъталгу чялишну хIала бувххун зий бушиву. Бувсунни агьали ххари бувансса, бахшишру хIисаврайсса яргсса ишругу бикIантIишиву.
Ва чирилунсса давриву бутIа бишин ччиминнан: Сбербанк 2202 2005 4208 5442, ва телефондалул номер карталуцIун цIакь бувну буссар 8 988 436 44 30 (Асият Аьбдуразакьовна).
ДакI дарцIуну буру вай зума дугьаврил чаннасса кьинирду кумагну хъанахъишиврий диннал ва миллатирттал дянив аслахIшиву, рязишиву цIакь шаврин, жулва жяматраву кувннал кувннащалсса арарду ххуй шаврин. Муфтиятрал ва лакрал активистътурал хIарачатрайну дуван дакIнийсса ва мероприятиягу лакрал кувннал кувннах­сса ччаву хъиннура цIакь дувансса хьуннав.
Мубараксса Рамазан зурул гьарца кьини дуцIиннав Заннаятусса цIимилул, узданшиврул ва барачатрал!