Вакцинартту буллалаву кIилий анавар дурккун дур

Апрельданул 20-нний Дагъусттаннал БакIчи Сергей Меликовлул дунни коронавирусрал инфекциялийн къаршисса Оператив штабрал батIаву.

Республикалул каялувчинал дакIнийн бувтунни, Оперштаб эпидемиологиялул тагьарданул ялув бавцIуну бушиву. Сергей Меликовлул тIимунийну, Да­гъусттаннай ттигу-шилагу къадагъа дирхьуну дуссар бяла­хъаврил давурттай, дезинфекциялул низам къадуркьун дур ттигу жяматийсса транспортрай, халкь чIявуну батIайсса кIанттурдай.
МуницIунма Республикалул каялувчинал бувсунни инсантурал дукра дукайсса кIанттурду хьхьунил ссят 3 хьуннин зий бушиврийну къашавайми гьарза хъанай къабивкIшиву, муния буслай бур цифрардал. Миннул заллухъруннал, увкунни Меликовлул, бартдигьлай бивкIссар Роспотребнадзорданул тIалавшиннарду. «Амма банкетирттал заллал заллу­хъруннал ми тIалавшиннарду бартдигьлай бакъая. Къадагъа дирхьуну диркIнугу, банкетирттал заллаву хъатIив ва цаймигу шадлугъру дуллай бия»,– кунни Сергей Меликовлул
ДР-лул ЦIуллушиву дуруччаврил министерствалул ккаккиярттайн бувну, апрельданул 19-нний вакцинартту бувну бур 52 азара инсаннал. Ми хъанай бур дянивну, ца кьини ларсун, 1400 инсаннал баву. ХьхьичIмур Оператив штабрай ихтилат буссия ца кьини 638 инсаннал баврия вакцинартту. Учин бучIир вакцинартту буллалаву кIилий анавар дурккун дур куну.
Республикалул каялувчинал бувсунни му масъалалух къулагъас ххи дуван аьркиншиву. ДР-лул ЦIуллушиву дуруччаврил министерствалийн тапшур бунни тагьарданул хъирив лаян, вакцинартту чанну буллалисса кIанттурдай буллали буван.
Республикалул вице-премь­ер Анатолий Карибовлул тIи­мунийну, цIанасса ппурттуву Дагъусттаннайн бучIан бувну бур 72 азарунниха ливчусса дозарду вакциналул. Ми циняв бавчIуну бур медициналул идарарттайх.
Республикалийсса эпидемиологиялул тагьардания ихтилат бунни Роспотребнадзорданул управлениялул каялувчи Николай Павловлул. Ванал тIимунийну, ца гьантлий къашавай хъанахъими бур 0,13% даражалий. ХьхьичIми нюжмардах бурувгун, къашавай хьуминнал аьдад чан хьуну дур.
Николай Павловлул муниципалитетирттал каялувчитурайн тапшур бунни мизитирттал имамтуращалсса даву дачин дуван маскарду дахIаврил ва дезинфекцияртту дуллалаврил низам дуручлачаврил хIакъираву.
БатIаврий ихтилат бунни ДР-лул цIуллушиву дуруччаврил министр Татьяна Беляевал. Мунил тIимунийну, ковидрал къашайшалт хъин баву мурадрай дузал бувну бур 1103 койка, миннувату цIана илкинну бур 255. Махъсса шанна нюжмардий уттубишин бувсса ковидрал къашайшалт ца даражалий бур. Азарханардай хIакьину ур 848 къашайшала, реанимациялул отделенияр­ттай ур 78 инсан, шава хъин хъанай ур 475 инсан.
БатIаврий ххал бивгьунни Буттал кIанттул цIанийсса Хъунмасса дяъвилий ххув хьуну 76 шин шаврил шадлугъру даврил масъалагу. Муния ихтилат бунни ДР-лул ХIукуматрал Председательнал хъиривчу Муслим Телякавовлул. Мунал бувсунни цукунсса шадлугъру хьунтIиссарив республикалул шагьрурдай ва районнай.

Читайте также: