ЛичIи хьунни жуятува Дагъусттаннал телевидениялул бусала

[dropcap]В[/dropcap]ай гьантрай лавгунни дунияллия Дагъусттаннал телевидениялул лажинчIиранугу, вирдакIнугу бивкIсса, ххюцIа­лунниха лирчусса шиннардий дикторну зий бивкIсса, Аьрасатнал культуралул лайкь хьу­сса зузала Галина Дулиева. Ттун кьурчIи бивзунни чIявуссаннан ва лакку душ бушиву къакIулну лякъаву: социал сетирдай, вагь, лакку душъяв, къакIулссия, къабавссия тIиссагу бия комментарияртту.

1992-ку шинал на, Дагъус­ттаннал университетраву 5-мур курсирай дуклай бунува, «Илчилий» зий буссияв. Гъира-гьавас буну зузисса, журналистикалул мухIлу-хIин ххуйну лахьхьин хъит тIисса на «Лакку душ» тIисса рубрика хIасул бувссия, итххявхсса, гьунар бусса жулва хъанния чичлачисса рубрика. Ва рубрикалул бувцуну лавгссияв Галина ДулиевачIангу.
Галина аьпалухьхьун лагаврил мутталуцIунгу бавхIуну, жун пикри хьунни диялсса шиннардил хьхьичIва ванищал бувну бивкIсса ихтилат цал уттигу бищун. Бюхъай дахьва журналистикалувун бухлахисса ттуща му интервью бюхъу чанну хьуну дикIангу. Му кIанттул ялттугу бучIанхьуви тIий бура буккулт.

---

П.Р. – Галинай, вил цIанил реклама дуллалавриву аьркиншиву дакъар. Амма бюхъай вил оьрмулул ххуллия чIявуссаннан хавар къабикIангу. Буси инава дикторнал касму язи дугьаврил мархха-ххунулия.
Г.Д. – Оьрмулуву чIявуну шайсса кунма, цимурца хаварсиз хьуна. На цал Политехнический техникум къуртал бувссия, Приборду дувай заводрай зий бу­ссияв. Дикторнал кIанттайнсса конкурсравух гьуртту шаврил ттул кьадар ца чулухун бувтуна. Мяйжанссар, ттун ччянива художественный самодеятельность, шеърирду ккалан ххирая. ХIакьину жяматийсса иширттаятусса гъалгъа сийлий ба­къанугу, на школалий, техникумраву дуллалисса ккалли дан­сса давурттавух чялишну гьуртту шайссияв. Вана утти, мартрал 6-нний, на дикторну зий 23 шин хьунни.

П.Р. – Дикторнал пиша жапасса, тIалавшиннарду дусса бур. Цукун инава дакI дакъа, ягу бувххун бухьурчагу, тамашачитурал хьхьичIун буккан аьркинна дакI-ненттабакI тIивтIуну. Вил симандалий хIисав къашай хIал чаншиву, гъира бакъашиву, хIал бакъашиву, оьрмулух­сса караматсса мякьлил асар лещаву щуркIал къашай. Цукун бюхъай вища му ялттурасса къат ядуван?

Г.Д. – Юх, шикку къат, маска тIутIаву къатIайлассар. На къалпсса пишру пишкаш буллан къабикIайссара. Передача дайдишиннин, ттун ххуйну бувчIлан бикIай аьчухшиву ди­кторнан чара бакъа аьркиншиву. Мунияту на дакIнийхтунусса, тIабиаьтрал ттунма буллу­сса пишгу увкуну, учаймургу дакIнийхтунусса такьвалийн буцара. Му ттул буржри. Дикторнан бикъавсса ягу къатяхъа­сса пишлийну инсантал хъяврин буллан къабучIиссар.

П.Р. – Галинай, 23 шинал лажиндарай, гьарца кьини тIиссакссагу, эфирданийн буклай бунува, халкь вия бизарния ци хьуви, мудангу мякьну бикIай. Цукун ясир бувара ина ми?
Г.Д. – Бизарнияча хьухьун­ссар ттуя циняв танийва (хъян бикIай). Хаснува махъсса ппурттуву, ччайнугу-къаччайнугу, ттун чIявуну эфирданийн бу­ккан багьай. Ттуяр ххишала ца диктор акъа-акъархха. Илдар ва даврихун дахьа машхул хьусса ур, лаккучуврихха цувагу. Казбек Караев, ва ттун ца уссу куна ххирассар, «Платан» каналданийн лавгунни.
П.Р. – ТIайлану буси, лажиннича, инава шацI хьусса, цамур даврий хъинниха тIисса пикрирду къабуххайрив? Ттизаманнул ялапаршин мукунсса дурхха, циняв коммерциялувун кьутIлай бур. Вингу мукунсса даврихун багьан ччай бакъарив?

Г.Д. – Бакъар, цанчирча, ттун ттулла даву чIувну ххирар. Мяйжанссар, дикторнал дурагу 1400-1500 къурушри ласай­сса зуруй. Ци бухьурчагу, цала даву ххира­сса, му давриву бюхъу бусса инсан арцуя чанну пикрирду буллай икIайхьунссар. Арцул ттул даврил дя-зума къарищунтIиссар. Касмурду чIярунугу, оьрму ца бур. Ттунна ччисса давриха зий бура, дакI давриву дирхьуну.
П.Р. – Вил чIюлусса костюмирттаясса, авадансса гардеробраясса хавардугу, туну, аьдадасса хавардурив?
Г.Д. – На му чIюлушинна нара сакин дувара ттунна. Ттун ххал-ххалаххул даву ххуйну кIулли, муни-тания щаллушин дан, аьмал бан кIулли. На хьхьичIва-хьхьичI хъамитайпарахха.
П.Р. – Экрандалул хIу­рулъ­энну личIан ласналмур харжираягу кумаг бакъа бакъахьун­ссарча…
Г.Д – Ттул лас МВД-лул сотрудникри. Мугу тихун-шихунай хъапа тIисса акъар, цалла даву дакI марцIну дуллалисса инсан ур. Щак бакъа, арцул дузалшин, хъус-хъиншиврул щаллушиву – му гьаксса ххуйри, къаоьккир. Амма инсаншиву – му журатри.

П.Р. – Утти булунна ца тIааьн бакъасса кунмасса суалгу. КIул­сса зат бур диктор чурххава бавкьусса, тIааьнсса, бюххан­сса чIугу, такьвагу дусса бикIан аьркиншиву. Му дур цалчинмур шартI. КIилчингу, дикIан аьркинни ххуйсса дикция. Ми кIивагу чулуха ина бювхъусса бура, инкар бан къахьунссар. Амма, рязи хьу, ми тIабиаьтрал пиш-каш дурсса каширду дур. Вил гьунарданул бияла бакъар микку. БикIайхьунссар «ссахлунур Дулиеван «Дагъусттаннал культуралул лайкь хьусса деятель» тIисса цIа дуллусса тIутIиссагу…
Г.Д. – Нава ва студиялий ци даву дулларчагу, ларайсса цIардайн хъит тIий къабивкIра, лахъа-хъуншивурттал хъирив багьну къабивкIра. Ттун мукунсса кьимат бивщунни. Дурмунил ккал дуллан къухьунссар. Ттун чIярусса передачарттал авторшиву ттунна дуллан багьай. Масалдаран, ттигъанну, Ххувшаврил байран госпитальданий кIицI лаглагисса программалуву, ттун анавархъиндарай текстру сакин буллан багьуна. Лагма-ялттусса хавардал хIакъираву тIурча… Ци чулий дунугу, ттул цIа халкьуннал итталу духьурча – мунийнгу щукрур. Ттуя ихтилатрай бухьурча, халкь ттуя шацI хьун бувассар…

П.Р. – Машгьуршиву оьрмулуву, кьатIу-шав бувктари вихунна дахчилан къадикIайрив?
Г.Д. – Аганаки базаллуву, кIичIираву ттухра дугьарасса къари-за къулагъас дулларча, ягу къужа иттав цIитI икIарча, ттун цичIав къабикIай. Хъами на ци ларххун буссарив, ттул кIизуй цукунсса прическа дуссарив диван булларча, миннал чIарахгу на паракьатну лагара. Амма цахъи хIая чансса, хIаярава бувксса, биргьаравсса арамтурал на ссибизлази бара. Нания щюлли душ бакъара. Ссавур дуван багьай…

П.Р. Балики арамтал ялтту бишаврил сававну ина лапва исвагьисса бушаву дикIан? Шиккува учин, вин, масалдаран, актриса хьунсса гъира къабикIайрив?
Г.Д. – Юх, актриса хьунсса кьудрат ттуву дакъассар. Аганаки на исвагьину чIалай бухьурча – мугу ттул аьмалли (чIявуссаннан ххуйну кIулсса пиш учай). Ттулла диялдакъашивурттугу ттунна кIулли.
П.Р. – Вил ихтилатрава ттун бувчIунни вил кIира ччаву, кIива талихI бушивугу: даву ва кулпат. КутIану бунугу, кулпатраягу бувсния.

Г.Д. – Ласная на нукIува бусав, га ттул ца дакъа-дакъасса ччавур, ттул чул бищай ттарцIри. Хъунмур душ Марина филологиялул факультетрал 2-мур курсирай дуклай бур. Марина бувайни на навагу гава факультетрай заочнайну дуклай буссияв. ЧIивимур душ Ольга 9-мур классраву дуклай бур. Ттун ттула душвавращал чIунгу гьан дуллан ххирар. Вай ттул талихI-тирхханнур.
П.Р. – Багъишла битича, арс къауллуннихха тIисса пашманшивугу дагьайрив?
Г.Д – Цумур ниттивур му къадикIайсса?…

П.Р. – КьюлтI бан циванни, на вищал хьунабакьин нанийни, вас-ццахгума тIий буссияв. Инарив пахру-хумардая лап архсса, хIалимсса лявкъунна, мунияту вил занакьулушиндарацIун бу­ттал цIа тIутIавугума цукуннив къадакьлай дур.
Г.Д. – На бюхъай лапва щяйтIан бакъасса бикIангу. Ттула душругума ттуй аьй-бювкьу дуллан бикIай. Ци-бухьурчагу, муна мурахха на – Галина Дулиева.
П.Р. Вища, хIалу дагьну дунура, лакраяту ци учин бю­хъанссия?
Г.Д. – Пахру-ххара бакъа учин, лак бюхъу-гьунар бусса, гьармуниву итххявхсса, аькьилсса, ччимур кьартIагу, дардгу лайкьну духIан шайсса уздансса агьлу бур. Ттул ппу Ккуллал райондалиятуссар. Аьмну жул кулпат интернациональнайссар.

П.Р. – Ци чIа учинна ина лакку хъаннин?
Г.Д. – Хъаннин цинявннанма хIакьину захIматну бур. Даврил ва оьрмулул опыт хIисавравун лавсун, хIакьину личIинува ласру аьнцI-ккихь тIисса бур, мукунма наслугу. Ссавур дуван багьайни, ссавур дуллай бакъар, цIими буван багьни, цIими буллай бакъар. Оьрмулул лахъишиврий дурхIусса захIматшивурттал жунна хъиншиву, дусшиву ва аькьилшиву дакIнийн дутлай дур. Мунияту, уттиния тихунмайгу аьзизсса лакку хъаннин чIа учин ччива так зунттал хъаннин хасъсса чувшиву, мунищала – ттюнгъашивугу, узданшивугу.
П.Р. – Барчаллагь!

«Эфирданул хIурулъэндалущал»
ихтилатрай бивкIссар ПатIимат Рамазанова
«ИЛЧИ», № 23.
5 июнь.1992 шин