ХIакьинусса кьининийн Дагъусттаннай вакцина бувну бур 52 азарунния ливчусса инсантурал. Му бан ччай бур Дагъусттаннай усру даврил аралуву бизнес нани дан бувкIсса Италиянал вакилталгу.
Дагъусттаннайн бучIаврил сававну хьунугу дур пандемия – цаламур билаятрай даву дарцIуну лирчIун душиву. Италиянал хьхьичIунсса усру дувай фабрикалул заллу Марко Гроссощал увкIун ур цIанихсса дизайнер Луиджи Брилянтинигу. Вагу, дунияллул хьхьичIунсса модалул ляличIисса пишакар, коронавирус сававну шинал лажиндарай даву дакъа ливчIун ивкIун ур. Мунийн бувну, ххарину рязи хьунугу ур Аьрасатнавун зун учIан.
Фабрикалул каялувчи, жула лаккучу, ШавкIратусса Мурад Жалаев дакI дарцIуну ур Италиянал цIанихсса уссал усттартурал кIулшивуртту ва бюхъу сававну цала идара дунияллул цIанихсса брендирттащал ччалли буккайсса даражалийн буцин бюхъантIишиврий.
Марко Гроссо дакIнийхтуну барчаллагьрай ур Дагъусттаннал ишбажаранчитурайн, цала ярагъ шихун ласун кумаггу бувну, дакIнил ларсъсса давриха зунсса каши сакин дуваврихлу.
Ванал мукунма бувсунни цува мукIруну ушиву Аьрасатнал вакцина Спутник-V хIакьинусса кьини дунияллий яла хьхьичIунмур бушиврийн ва цувагу му бан най ушиву. Италиянаву вакцина баншиврул багьлай бусса бур шинал хьхьичIва яржа бувгьуну ацIан. Аьрасатнаву тIурча, вакцина бан ччисса инсантурахун цичIар дахчилай дакъар тIий ур. Вакцина баншиврул вай ялугьлай бусса бур ДР-лул Минздраврал ихтияр дулуннин.
Буйнакскалийсса му фабрикалул багьу-бизулиятугу, кIикку зузисса жула лакраятугу гьарза-гьартану бусан жу хIарачат банну «Илчилул» ялунсса номердай.
