КIилчинмур ЦIувкIравгу щунни Хъарас

Вай чаннасса интнил гьантрай щархъай Хъурдаккаврил байранну чан дакъар. Хъарас щаврил байран аьдатравун дагьну дур КIилчинмур ЦIувкIуллал жяматрачIагу. Гьашинумур байрандалул хъар цайнна ларсун дия «Строительно-Техническая экспертиза — испытательный центр» идаралул директорну зузисса МахIаммадов МахIаммад МахIрамлул арснал.
Ванал чIаравгу бацIан, Хъурдаккаврил байрангу хъун дан шяравун бувкIун бия личIи-личIисса шагьрурдаясса шяравучутал, гъан-маччами ва хъамал.

А. АхIмадова
Байран тIитIлай, шяраваллил администрациялул бакIчи Казбек Аьбдулкаримовлул барча дурна щарнил жяматрахь Хъарас щаврил кьини, чIа увкуна гьарцагу ужагъран буллугъсса шин. Махъру лавхъуна мукунма хъамаллурал ва шяравучутурал.
Ва давривух чялишсса гьур­ттушиву дурунни жагьи-жугьултрал ва дуклаки оьрчIал. Бунни бяст-ччаллу, тяхъасса тIуркIурду. Байран чIюлу дуруна лакрал балайчитурал: МахIад Гудовлул, Халисат Рамазановал, Сулайман ЯхIияевлул ва мукунма цайминнал.