Дагъусттаннал виваллил иширттал министр, полициялул генерал-лейтенант Аьвдурашид МахIаммадовлул сипталий, «Забота» тIисса оьрчIал интернатраву хъуннасса субботник дунни.
Субботникрай гьуртту хьунни цува министр, мунал хъиривчутал ва министерствалул зузалт.
КIюрххила полициялул зузалт зузийни лаххайсса янналуву интернатрал лагма-ялттусса кIанттурду лазилакьи буллай байбивхьунни. ДартIунни ччюрк, марцI дунни аьрщи кьавкьсса мурхьирдацIа ва къатIрацIа, бакьин бунни газон. Интернатрал хъунмур корпусрал чIарах бувгьунни мурхьру.
Субботник къуртал хьуну махъ Аьвдурашид МахIаммадовлул ккаккан бунни интернатрал зузалтран ва оьрчIан республикалул БакIчи Сергей Меликовлул буллусса цIусса микроавтобус «ГАЗель NЕХТ». Цала чулуха министрнал дуллунни интернатрал директор Ума Качаловахьхьун куклу машиналул кIулли ва номерду. Ума Качаловал барчаллагь увкунни министерствалул каялувчитурахь ва зузалтрахь цахара дуллалисса аякьалухлу ва хъинну цанна аьркинсса бахшишрахлу.
