ЛичIи-личIисса миллатирттал оь хIала бувхсса оьрчIру гьунар бусса, итххявхсса бикIайссар тIун бикIай.
Мяйжаннугу, мукунсса бур Ккурккуллал шяравасса Тамила Магьдиевал оьрчIру Лев ва Татьяна Шустовхъул. Цуппа Тамилал циламур агьлугу пагьму-гьунар ххисса, элмулул, спортрал ххуллий хьхьичIунмайсса инсанталли.
Лев дуклай ур МахIачкъалаллал 11-мур школалий 8-мур класс­раву.

Ва хъинну жагьилтурал ва жяматрал иширттавух гьуртту хъанахъисса оьрчI ур. Ва Аьра­сатнал дуклаки оьрч1ал су­ккушиннарал (общероссийская общественно-государственная детско-юношеская организация), «Ххувшаврил волонтертал» тIисса щалагу Аьрасатнал жяматийсса суккушиндарал чялишсса членни. Дагъусттаннал хъуними классирттал дуклаки оьрчIал советрал хъунаманал хъиривчури. Вай гьантрай Лев гьуртту хьунни республикалул жагьилтурал центрданий хьусса летчик-космонавт Муса Маннаровлущалсса хьунабакьаврий. Лев ялун уккансса жагьил ур.

Татьянан 17 шин дур. Ва дук­лай бур Дагъусттаннал уни­верситетрачIасса юридий колледжраву 1-мур курсрай. Ихтиярду дуруччай органнаву зунсса хияллай бур. Татьяна бур спортраву итххявхсса душ. Дур ванил спортрал ххуллий ларсъсса чIярусса наградарттугу. Утти­гъанну хьусса СКФО-лул тхэквондолул бяст-ччалливу ванил бувгьунни кIилчинсса кIану.
Лев ва Татьяна ялун нани­сса никирал яргсса вакилтал бур. Вайнная жунма ттигу баянссар тIий бура.
ТIайлабацIу баннав гьарица дуллалимуниву.