Мартрал 21-нний Рутуллал райондалийсса ЦIахъюрдал шяравун занчру бувкIун, 9 шяравунсса ххуллу лавкьуну, райондалущалсса дахIаву дакъа ливчIун бия.
Мартрал 21-нний маркIачIан бивзсса чIумал тиккун бивну бур цалчинмур занч. Марххала буллайнма бивкIун бур кьинибархангу, хьхьувайгу. Мартрал 22-нний Рутуллава хасъсса техника дучIан дурну, зунчавух нух дурккун, ххуллу бувну бур. Амма апатI мунийну къуртал хьуну бакъар: мартрал 23-нний, ахттая махъ, гава кIанавату бувкIун бур ялагу ца занч – таксса хъунмасса занч тиккусса халкьуннан тачIав ккавккун бакъар. КIилчин бувкIмур занч шяравух ппив хьуну бур мугьали хьуну, ххуллийх хьхьичIун дагьмургу ккуччу дуллай. Ххуллул мурзусса кIанай ца машинагу ахьния бувтун бур. Щарнил жямат тамашалий бивкIун бур, инсантуран зарал бивну бакъар.
Хъиривмур кьини, мартрал 24-нний, занчру бувкIсса кIанайн к1юрххила бивну бур МЧС-рал, Минтрансрал ва Дагавтодорданул зузалт, Рутуллал райондалул бакIчи Ибрагьим Ибрагьимов.
Мура кьини лачIлай диркIун дур чявхъагъарал ва буллай бивкIун бур атилсса марххалагу.Гьавалул тагьаргу хIисавравун ларсун, МЧС-рал зузалтран хIукму хьуну бур ххуллу марцI буккан буллай байбишин хъиривмур кьини.
КутIану бусан, 8 занч бувкIун бур вай гьантрай ЦIахъюрав. Зунчардил лахъшиву дирк1ун дур 30 метраксса. Ххуллу бувну къуртал хьуну бур так мартрал 30-нний.
