Мартрал 31-нний Дагъусттаннал БакIчи Сергей Меликов хьунаавкьунни ДР-лийсса инсантурал ихтиярдал вакил Жамал Аьлиевлущал, ишбажаранчитурал ихтиярду дуруччаврил вакил Мурад ТIалхIатовлущал ва ДР-лий кулпатирттал, ниттихъал ва оьрчIал ихтиярду дуруччаврил вакил Марина Ежоващал.
Сергей Меликовлул тIимунийну, жулва хьхьичI бур бартбигьин аьркинсса цаппара задачартту. Миннувасса цалчинмур хъанай бур цIана хIадур буллалисса Дагъусттаннал Социал –экономикалул лябуккулул стратегия.
— Му бартбигьин аьркинни кIива ятIапрай: цалчинмур – 2024 шинайннин, кIилчинмур – 2030 шинайннин. Стратегия бакьин буван аьркинни нацпроектру бартдигьаврицIун. Микку бикIантIий бур ишбажаранчитурал ва социал аралул давурттацIун бавхIусса масъаларттугу. ХIакьину жура бартдигьлай буру оьрчIал иширттацIун дархIусса шанна нацпроект – «Демография», «Дуккаву» ва «ЦIуллушиву дуруччаву», – кунни республикалул каялувчинал.
Ххал бивгьунни дагъусттанлувтуран хъуннасса агьамшиву дусса цаймигу масъалартту. Сергей Меликовлул омбудсментурахь тавакъю бунни хъуннасса къулагъас дуну бартбигьлан республикалул ялапартуврал ихтиярду ва тархъаншивуртту дуруччаврил масъалартту.
