Март зурул 27-нний бартларгунни 5 шин Росгвардия сакин хьуну ва 210 шин ихтиярду дуруччай аьралуннал гьану бивзун.
Ва иширацIун дархIусса шадлугърал мероприятияртту хьунни Кас­пийскаллал ОМОН-лул базалий.

Шикку гьуртту хьунни Росгвардиялул Ухссавнил Ккавкказуллал округрал командующийнал хъиривчу генерал-майор Игит Менафов, Дагъусттаннал каялувчитал, Халкьуннал Мажлисрал, кIанттул министерстварттал ва ведомстварттал вакилтал, шагьрурдал ва районнал бакIчитал, ветерантал, жяматийсса организациярдал вакилтал.
Шадлугърал мажлис тIив­тIунни Аьрасатнал Виричу, Дагъусттаннал Росгвардиялул управлениялул хъунама, полициялул генерал-майор МахIаммад Баачиловлул.
Ванал кIицI лавгунни Да­гъусттаннал Росгвардиялул уп­равление сакин хьуния шихунмай ва къуллугърал аьралитурал хъуннасса даву дуршиву республикалул агьалинал мюхчаншиву дуруччаврил цIаний. Барчаллагь увкунни зузалтрахь цала къуллугърал буржру марцIну, лавайсса даражалий бартбигьлай тIий. Барчаллагь увкунни къуллугърал цIанихсса тарих ва аьдатру лайкьну дуручлачисса, жагьилминнащал опыт кIибачIлачIисса ветерантурахь.
Росгвардиялул зузалт барча буллалисса ихтилатру бунни Дагъусттаннал виваллил иширттал министр, полициялул генерал-лейтенант Аьвдурашид МахIаммадовлул, Дагъусттаннал Халкьуннал Мажлисрал председательнал хъиривчу Камил Давдиевлул. Ихтилатчитурал кIицI лавгунни Росгвардиялул аьралитурал пишакаршиврул даража, бюхъу-хъит, къучагъшиву.
Ихтилатру къуртал хьуну махъ хьхьичIунсса зузалтран ва аьралитуран дуллунни ведомствалул чулухасса наградартту. Хъирив цинявннал дирхьунни тIутIив къуллугърал бурж бартбигьлай жанну дуллусса зузалтрал гьайкалдануцI ва баян бунни минутрайсса пахъ багьаву.
Мероприятиялул лагрулий ОМОН-лул ва СОБР-рал аьра­литурал ккаккан бунни цала гьунарду: каруннай бияврил ва ярагъуннищал занакьулу бикIаврил приемру, тахсиркар угьансса чаранну ва м.ц. ХIаятраву бия ккаккиялун бивхьуну Росгвардиялул хасъсса подразделениярттал аьрали ярагъ ва хасъсса техника. Аьдатравун багьсса куццуй, тIивтIуну бия полевая кухнягу.
Каспийскалийсса мероприятие къуртал хьуну махъ вара кьинилуцIун дархIусса концерт хьунни Оьруснал театрдануву. Ва хIадур дурну дия Росгвардиялул МахIачкъалаллал соединениялул аьрали оркестр­данул, Дагъусттаннал эстрадалул артистурал, республикалул творчествалул коллективир­ттал. Ххаллилсса къавтIавуртту кка­ккан дунни «Лезгинка» ансамбльданул.
Концерт дайдишин хьхьичI ихтилат бувсса Дагъусттаннал БакIчинан кIанайсса Сергей Меликовлул лавайсса кьимат бивщунни къуллугърал даврин.
«Ххюра шинал лажиндарай национал гвардиялул аьра­литурал хъуннасса даву дур­ссар мюхчаншиву ва жяматий­сса низам дуруччаврил ххуллий. Ва чIумул мутталий сакин дурссар 85 кIанттул управление. Росгвардиялул аьралитурал ккаккан бувссар цала хIал, пишакаршиврул лавайсса даража. Вайннал хIакьину лайкьну бартбигьлай бур 210 шинал лажиндарай виваллил аьралуннал щаллу буллай бивкIсса бигарду. ЛяличIинура хъунна­сса хъар лархъссар Ккавкказуллал республикардайсса аьралитурал, шикку тагьар оьлуркъусса чIумал низам дуручлай хьхьичI ххуттай бавцIуну. 1999-ку шинал халкьуннал ополчентуращал данди бав­цIуссар дунияллул террористурал кьюкьри Дагъус­ттаннал аьрщарайн дурхсса чIумал. ХIакьину шиккугу бур тай иширттаву гьуртту хьу­сса аьралитал. На дакIнийхтуну барчаллагь тIий ура вайннахь та захIматсса чIумал Дагъус­ттаннал мюхчаншиву дуручлай хьхьичI ххуттай бивкIун тIий», – увкунни Сергей Меликовлул.
Хъирив хьхьичIунсса зузалт­ран дуллунни Дагъусттаннал ПаччахIлугърал наградартту.