Апрельданул 13-нний Дагъусттаннал бакIчи Сергей Меликов хьунаавкьунни Дуккаврил ва элмулул аралувусса надзорданул федерал къуллугърал каялувчи Анзор Музаевлущал. Хьунабакьаврий гьуртту хьунни ДР-лул ХIукуматрал Председатель АьбдулпаттахI Амирханов, ДР-лул дуккаврил ва элмулул министр­нал буржру чIумуйну бартбигьлагьима ЯхIия Бучаев ва цаймигу.

Хьунабакьаврий ххал бивгьунни Дагъусттан 2021шинал паччахIлугърал хIасиллал аттестациялийн хIадурну бушиврул ва дуккаврил хIакъиравусса цаймигу агьамсса масъалартту.
Анзор Музаевлул тIимуний­ну, ЕГЭ дуллан хьхьичI МахIач­къалалив дурну дур цаппара батIавуртту му экзамендалийн хIадур шаврил хIакъираву, ххал бивгьуну бур субъект цукун хIадур хьуну бурив ми экзаменну дулун.
Рособрнадзорданул бакI­чинал бувсунни мукунма аьркинну бушиву цаппара муниципалитетирттай ва аьмну республикалийгу дуккаврил даражалун кьимат бищун. «Мунил мурад хъанахъиссар республикалул циняв школарттай дуккаву лавайсса даражалийсса душаву, муния рязину бикIаншиврул дук­лаки оьрчIругу, миннал нину-ппугу», – кунни мунал.
Хьунабакьаврий ххал диргьунни «Дуккаву» тIисса национал проект бартдигьавугу.
Анзор Музаевлул бувсунни мукунма дуккаврил чулуха махъун багьлагьисса школарттал учительтуращал ва дуклаки оьрчIащал давуртту дачин дуллансса методикартту хIадур буллай бушиву.