КIинттул, дяркъу хьунтIий дусса дур тIий социал сетирдавугу чичлай, МЧС-рая «личIлулну бикIи» тIисса смс-карду дукIлан диркIуннихха, чурххавун оьккисса нигь дагьай. КIуллихха дяркъу шаврищал кьини дуккантIишиву оьрмулул бугьараминнайх ва мюрщи оьрчIайх. Чани, щин дакъашиву цукун-дунугу духIанссия, къатраву ва чIумал гъилишиву дакъани цири бантIисса? Цукунни хъунав хьусса, шанийн агьсса инсан гъили лаган антIисса? Жула хъуншагьру тачIавгу, ттининнин вайксса шиннардийгу, кIинтнийн хIадур хьуну дакIний бакъар. Телевизорданувух тIурча, ца чIивисса, 200-300 азара инсан ялапар хъанахъисса шагьру, жува кунма, я чани бакъа, я щин дакъа бухьурча, щаллусса кьини муния буслай, «чрезвычайная ситуация» тIий, ца чялав багьай. Сайки миллиондалийн бивсса инсантал бусса МахIачкъалалия тIурча, ца чIу-чIитI къабикIай.
Вана ва ххуллухгу «цакуну» дуркIсса кIинтнил на махIаттал къабувунна. КIулссия, дяркъу хьун най дур тIисса чIумал, чани чара бакъа лещантIишиву бачIи кIанттурдай. Чани левщукун, дацIайссар щингу, гъилишиву нанисса станциярдугу. Ва ххуллухгу гава куццуй бачIи ххишалагу шагьру бивкIунни чани левщун, къатраву я щин, я гъилишиву дакъа, цIаннавун бювкьун. Ялун ттуккун, вай кIинтнил яла бявкъусса гьантрай ремонт дан лирчIун диркIссарив къакIулли, социал сетирдаву «Семендердай, Красноармейскалий жу я газ, я чани бакъа ливчIун буру» тIий, чичлачиссагу чансса бакъая. Язугъ бия леххаву тIисса: «Хасъсса къуллугъирттал диспетчертурал, дежурныйтурал телефонну гьаз къадуллай бур, жу щийн буккаву» тIисса агьалинай. Шагьрулул хъуниминналгу, хасъсса къуллугъиртталгу мира социал сетирдаву мукун чичлачиминнахьхьун дулайсса ва гьар чIумал тикрал дайсса жавабгу вари:
«Цуппа-ца къуллугъ жуйн мютIисса, жул канилусса бакъар. Гьарцаннул заллухъру бур цанма гьарзат кIулсса».
Лажиннича, цалва буржру биттур бан къабюхълахъисса идарарттаща ми къуллугъру зеххин шайсса законну кьамул дан къашайссарив республикалул каялувчитураща? Щилли ми ссуттилва, гъинттулва кIинтнийн хIадур хьун къабитайсса? Дакьин даймургу, лирмургу гъилисса чIумалла, дяркъу хьуннинна дакьин дан, даххана дан къабитайсса?
Шаппа дякъил ливтIусса къагьану, байраннугу къуртал хьуну, даврийн бувкIсса алхIаткьинигу хъуншагьрулул кIичIиртту лявкъунни микIиран бавкьуну. МикI бавкьуну бия бахьттагьалт лагайми ххуллурдайхгу, машинарттал хъуни ххуллурдайхгу. Машинартту лагайминнуйх чIалай бия микI бавкьуну, марххала лавну махъ къун бивчуну бушиву. Ххуллурду микIиран бавкьуну махъ ми бивчура, къабивчура! Социал сетирдавусса видеорттал буслай бия МахIачкъалаллал ххуллурдай марххала буллай байбивхьусса ца тталаткьини щусса машинарттал аьдад кIилий-шамлий лахъсса хьушиву укунмасса гьантрайнияр.
МахIачкъалаллал халкь укунмагу личIи-личIисса бала-апатIирттайн хIадурсса, чани, щин лешлашаврил сасан бувсса, ччюрклил «дяъвирду» чIун-чIумуй сукку шавричIан хIадурсса, дякIинттул маршруткалул багьри гьаз бан дакIнин багьсса шупиртурал забастовкарду духIайсса, интту-ссуттилгу гъараллу ларчIун, щинал гьузуйсса кIичIирттавух зана-кьала хъанахъисса, кьянкьа-кьурчIисса халкьри. КIива гьантлийсса дяркъугу дурхIуну, хъиривмур кьини гъили дагьаврищал вай захIматшивурттугу хъамаритантIиссар. Шагьрулул хъуниминналгу, аьдатрайн бувну, цичIав цаннасса «дарсругу» къаларсун, гьар шинах кунна, так дяркъу хьун хьхьичI кьинири «экстренныйсса» батIавуртту дайсса.
