Ванияр 50 шинал хьхьичI, ххал дигьлагьисса самолет дагьну, оьрмулуцIа хьуссар АхIмад-Хан Султан
Совет Союзрал кIийла Виричу АхIмад-Хан Султаннул гьаттайн Москавлив гьарца шинах батIайссар Дагъусттаннал ва Къирим-татарнал агьлу ва дунияллия лавгсса кьини, февраль зурул цанний. Гьашину ванал экипаж бусса самолёт дагьну 50 шин хъанай дур. Вара кьини АхIман-Хан увччусса Новодевичье хIатталлив СССР-данул халкьуннал артист Василий Лановойгу учлачисса кьини дуну, Аьрасатнал Президент В.Путингу миккун учIан най уну, ххуллу лавкьуну буну, хъирив кьини гьан багьунни АхIмад-Ханнул гьаттайн тIий, бувсунни 1-мур ЦIувкIратусса активист МахIаммад-ХIажи Загьидиновлул телефондалувух. Ванащал гьаттай бивкIун бур Заур Нахаев ва ХIамид Аьлиевгу, Къирим-татарнал диаспорагу.
– Ххувшаврил байрандалул кьинигу, Виричу увсса ва дунияллия лавгсса кьинирдайгу жу гьаттайн бучIаву, батIаву цIакь хьусса аьдат дур. Чара бакъа Дагъусттаннал культуралул центрданул вакилталгу бучIайссар. ЦIанакул, карантиндалул чIун дуну, личIину чIявусса агьлу къабавтIунни, жу, тIутIивгу дирхьуну, Виричунал оьрмулул ххуллиясса, чувшивриятусса ихтилатругу бувну, алхIам буккарду, дуаьрду дуварду, – увкунни МахIаммад-ХIажинал. Суратругу ваналли.
