Дагъусттаннал Росгвардиялул управлениялул зузалт гьуртту хьунни Ватан дуруччултрал кьинилун хасну хьусса акциярдаву. «Защитим память героев» ва «Ленточка памяти» тIисса патриот акциярду хьунни МахIачкъалалив, Лениннул комсомолданул цIанийсса паркраву. Мероприятие хIадур дурну дия «Ххувшаврил волонтертал» тIисса Аьрасатнал жяматийсса суккушиннарал региондалул отделениялул. Шикку гьуртту хьунни Аьрасатнал Виричу Загьид Загьидов, Дагъусттаннал миллатирттал политикалул ва диндалул иширттал министрнан кIанайсса Энрик Муслимов, аьрали иширттал ветерантал, Каспийскаллал флотилиялул аьралитал, МЧС-рал зузалт, жяматийсса ва жагьилтурал организациярдал вакилтал.

Мероприятие тIитIлай, ихтилат бунни «Ххувшаврил волонтертал» суккушиннарал кIанттул отделениялул каялувчи МахIаммад ХIусайхановлул. Ванал кIицI лавгунни мероприятиялул мурад Ватан дуруччултрал аьпа абад баву бушиву.
– Аьрасат мудангу бивкIссар ва бикIантIиссар цIакь бу­сса билаятну. На мукIрура, агана жула билаятран цичIар нигьачIаву духьурча, зувасса гьарицама Ватан дуруччин цIакьну бацIантIишиврий. Билаятрал къучагъсса тарих ябавриву зул бияла хъунмассар, – увкунни шикку гьуртту хьун бувкIсса жагьилтурахь Загьид Загьидовлул ва чIа увкунни ялун нанисса никиран дяъвилул оьсса сипат къаккакканнав куну. Да­гъусттаннал жагьилтал яла Ватан ххирами бушиву ва иш багьний Ватан дуруччин хIадурсса бушиву кIицI лавгунни Энрик Муслимовлулгу. Дагъусттаннал Росгвардиялул каялувчитурал ва зузалтрал цIания ветерантал барча бунни Управлениялул хъунаманал кумагчи, полициялул полковник Константин Шияннул. Ванал кIицI лавгунни Ххувшаврил волонтертурал хъуннасса даву дуллай бушиву, Ватан дуруччултрал цIарду абад даву ва ялун нанисса ник Ватан ххирану тарбия даву мурадрай.
Гьавалул ва десантрал аьралуннал ветеран Аьбдулла Фаталиевлул ккаккан дунни «Ветерантал» тIисса композиция. Ахирданий тIутIив дирхьунни Аьраличунал гьайкалдануцI, баян бунни минутрайсса пахъ багьаву.