Февраль зурул 22-нний Москавлив хьунни «Справедливая Россия» партиялул XI-мур съезд. Му съездрал бувсса хIукмулийн бувну, цачIун хьунни «Справедливая Россия», «Патриоты России» ва «За правду» партияртту. Шаннагу партия хIала дурххун махъ хьунни «Справедливая Россия – Патриоты – За правду» тIисса партия.
ЧIурду буллуну, партиялул каялувчину цIунилгу увчIунни Сергей Миронов. Ванал бунни съездрайсса агьаммур докладгу. «За правду» ва «Патриоты России» партиярттал вакилтал Захар Прилепин ва Геннадий Семегин бувчIунни партиялул сопредседательталну.
«Справедливая Россия» партиялул Дагъусттаннал региондалийсса отделениялул чулуха съездрай гьуртту хьунни мунил каялувчи Камил Давдиев, партиялул бюрорал секретарь Мурад Пайзуллаев, партиялул советрал член Ислам ХIусайханов ва цаймигу.
Съездрай «Справедливая Россия» партиялул Президиумрал Советрал член, ДР-лул Халкьуннал Мажлисрал председательнал хъиривчу Камил Давдиевлул кIицI лавгунни чIумул тIалавшинна диркIшиву шаннагу партия хIала духхан даву.
— Утти вай партияртту цачIун хьуну, цалва бюхъу ва каши ишла дурну, Аьрасатнал агьалинал ва паччахIлугърал ахIвал лавай баврил масъаларттаха хъиннува лябукку буну зунтIиссар, – увкунни Камил Давдиевлул.
