ДакI-аьмал хъинсса, цIими ххисса, архIала кьянкьасса, хъуннасса тIалавшинна цичIаннагу, къашайшалтрачIангу дусса Башанаева Тутубаващал кIул шайхту бивкIра: «Укунсса икIан аьркинни бунияласса хIакин», тIий.
Гьарицагу инсаннал оьрмулуву агьамсса кIану бугьлай бур мунал пишалул, сянатрал. Дунияллий чIявусса, личIи-личIисса пишарду бур. Гьарца пишалулгу цила ххуйшиву, агьамшиву, ляличIишиву дур. Амма ва цIана щалагу дунияллул халкь хьунабавкьусса коронавирусрал азарданул жунма цал ттигу тасттикь бунни хIакинналмур пиша яла агьаммур, бусравмур, аьркинмур ва яла жаваблувмур бушиву. Ва пиша язи бувгьуну, инсаннал цIуллу-сагъшиврул цIаний захIмат буллалимигу къучагъсса инсантал бушиву.
«Оьрмулул шанна шин хьусса чIумалва на увкуссия ниттихь, Гульжагьан ниттирссу кунма, хIакин хьунна», – куну. … Цинявппа мюрщи оьрчIан кунма, ттунгу ккаччи-ччиту ххирасса бикIайва. Ххюра шинаву цIунилгу ниттихь учав: «ХIакин хьунна, амма хIайвант хъин булланна», – куну. Ниттил, пишгу куну, жаваб дуллуна: «Инсантал хъин булларча къахъинав?».
«КIяла хялатирттавуминнал» хIурмат агьалиначIа мудангу бивкIссар. ХIакьину ттун бусан ччива ва бусравсса пиша язи бувгьуну, чIивисса оьрмулуву цила кIулшивурттайну, пишакаршиврул даражалийну къашайшалтрангу, даврил уртакьтурангу бусрав хьусса жула лакку душ Тутубава Башанаевая. ДакI-аьмал хъинсса, цIими ххисса, архIала кьянкьасса, хъуннасса тIалавшинна цичIаннагу, къашайшалтрачIангу дусса Тутубаващал кIул шайхту бивкIра: «Укунсса икIан аьркинни бунияласса хIакин», тIий. Хьурттал шяравасса Кьурваннул ва Гулизардул душ Тутубава цIанасса чIумал каялувшиву дуллай бур М. В. Гольцлул цIанийсса азарханалул нярал кровообращениялул тагьар къулайну дакъаминнансса неврологиялул отделениялий.
Бувну бур ва МахIачкъалалив. Дуклай бивкIун бур МахIачкъалаллал 3-мур школалий. Ванил школа къуртал бувсса чIумал, буттал пишалуцIун бавхIуну, вайннал кулпатран Москавлив бизан багьну бур. Тийх Тутубавал къуртал бувну бур 677-мур школалий физикалул ва математикалул класс. Мунияр махъ бувххун бур Н. И. Пироговлул цIанийсса Аьрасатнал элмулул ва ахттаршиннарал медициналул университетравун, лечебный факультетрайн. Цумур бухьурчагу пиша язи бугьан гьарица инсаннан ци-бунугу багьана шайхьунссар.
ХIакин хьунсса пикри Тутубаван оьрчIнийва хьуну бур. Вайннал агьулданий чIявусса хIакинтал бивкIун бур. Миннаву Тутубаван яла ххирамур бивкIун бур гьарица къашавай хьуманачIан левчуну бачайсса ниттирссу Гульжагьан.
Укун буслай бур цинма хIакиннал пиша язи бугьан дакIнийн багьсса куц Тутубава: «Оьрмулул шанна шин хьусса чIумалва на увкуссия ниттихь, Гульжагьан ниттирссу кунма, хIакин хьунна», – куну. Цахъи хъунма хьувкун ттун кIул хьуна га хирург бушиву. Му чIумалгу баян бав ниттин навагу хирург хьунтIишиву. Хъунма хIал къавхьуну ттул пикри баххана хьуна. Цинявппа мюрщи оьрчIан кунма, ттунгу ккаччи-ччиту ххирасса бикIайва. Ххюра шинаву цIунилгу ниттихь учав: «ХIакин хьунна, амма хIайвант хъин булланна», – куну. Ниттил, пишгу куну, жаваб дуллуна: «Инсантал хъин булларча къахъинав?».
Му ппурттуву ниттищал рязи къавхьунугу, яла ганил тIутIимунийн бувкIун бур. Мунингу ца иш савав хьуну бур. Школалий, физкультуралул дарсирай, ччан бувккун ва травматологиялул азарханалийн бувцуну бур. ХIакиннал гьан бувну бур нинугу, душгу рентген бишин 3-мур зивулийн. Рентгенгу бивхьуну махъунмай хIакинначIан нанисса чIумал чани левщун, щалагу зиву цIан ларгун дур. Лифт дарцIуну дур. Ци зунссарив къакIулну банд лавгсса вайннахь чIарах нанисса жагьилсса хIакиннал цIувххуну бур: «Кумаг аьркиннив?» – куну. Ниттил бувсун бур цалчинмур зивулийн хIакинначIан бучIан аьркинну бушиву. Ганалгу гьаз бувну Тутубава, 3-мур зивулия цалчинмур зивулийсса травматологнал кабинетравун биян бувну бур.
– ХIакьинугу барчаллагьрай дакIнийн утара та хIакин. Таний травматологнал кабинетраву на ниттил вичIилухун щурщу бувссия: «На кьянкьану пикри бав: инсантал хъин булланна», – дакIнийн бутлай бур Тутубава.
Университетраву дуклакисса шиннардий Тутубава хьхьичIунсса студентътурал сияхIрай бивкIун бур. Ванил хъуннасса гьурттушинна дайсса диркIун дур университетрал элмийсса ва спортрал иширттаву. Ва бивкIун бур САМБО-лул хъаннил цачIун дур командалул капитанну. Шамийла хьхьичIунсса кIанттурду бувгьуну бур Москавуллал студентътурал дянивсса спортрал бяст-ччаллаву. Лайкь хьуну бур ректорнал чулухасса Барчаллагьрал чагъарданун. Дуклакисса шиннардийгу ванил бакIрава къабуклай бивкIун бур оьрчIнийвасса хирург хьунна тIисса пикри. Хирургиялул кружокрайнгу занай бивкIун бур. Яла ниттил маслихIатрайн бувну, невролог хьун пикри бувну бур.
– Нагу, уссугу чIявуну цIухлан бикIайссияв ниттихь, инава психолог бунува, жун вила пиша циван маслихIат буллай бакъара тIий. Ниттил бувсуна психологиялул элмурдал корифейтал цинявппа хIакинтал бивкIшиву, – дакIнийн бутлай бур Тутубава.
Университетгу, неврологиялул ординатурагу Тутубавал къуртал бувну бур лавайсса кьиматирттай.
Ординатуралуву дуклакиссаксса хIаллай дачин дурну бивкIун бур студентътурал элмийсса кружок. Дур ванил цилалу дурсса ахттаршиннардугу. 2015-ку шиная байбивхьуну, цIана ва дарс дихьлай бур Москавуллал университетрачIасса инсаннал психологиялул элмулул ва ахттаршиннарал институтраву.
Ординатура къуртал байхту, кIира шинай зий бивкIун бур И. В. Давыдовскийл цIанийсса азарханалий. 2019 шинал бивтун бур Фрязино шагьрулийсса М. В. Гольцлул цIанийсса ЦГБ-лул нярал кровообращение ххуйну дакъаминнансса неврологиялул отделениялул хъунмурну. АрхIала зий бивкIун бур И. В. Давыдовскийл цIанийсса азарханалий дежурный хIакинну. Пандемиялул чIумал ва зун бивкIун бур 3-мур обсерваториялул отделениялийгу.
Гьай-гьай, ваксса даву дачин дан жагьилсса пишакарнан бигьану къабивкIун бур. Амма цила кьянкьасса хасиятрайнугу, тарбиялийнугу, Тутубава захIматшивурттал лахIан къабувну бур. Ялунгума сасан бувну бур. Ва барчаллагьрай бур цинна укунсса тарбия дуллусса, гьарица ишираву чIарав бивкIсса нитти-буттайн.
– На ва даражалийн лахъавриву ттул нитти-буттал бияла хъунмассар, – тIий бур Тутубава.
Тутубавал нину-ппугу цала-цала давурттай хьхьичIунсса, бусравсса пишакартал бур. Ванил ппу Кьурван адвокат ур. Ва Москавуллал областьрал адвокатътурал коллегиялул членни. Лайкь хьуну ур «ХIурматлувсса адвокат» тIисса цIанин.Нину Гулизар психологиялул элмурдал кандидатри. Ва бур Н. И. Пироговлул цIанийсса Аьрасатнал медициналул университетрал кафедралул доцент. Гулизар ХIажиевна мукунма хъанахъиссар Москавливсса «Дагъусттан» Культуралул центрданул президиумрал член. Махъсса шиннардий каялувшиву дуллай бур Центрданийсса медициналул зузалтрал Ассоциациялийгу.
– Цила икIайкунсса пишакар ххуйсса психологгу икIан аьркинссар: цаманах вичIи дишин, ганал дакIниймур лаласун, га паракьат ан, ххуймунийн вихшала дишин ан кIулсса. Вай цимурца ттун лавхьхьунни ттула нитти-буттая, – тIий бур Тутубава.
