«Агьаммур масъала – инсантурал оьрмулул даража лахъ бавур»

Февральданул 17-нний Дагъусттаннал БакIчи Сергей Меликовлул дурунни ДР-лул ХIукуматрал гьарта-гьарзасса батIаву. Микку ххал бигьлагьисса масъаларттаву яла агьаммур бия Дагъусттаннай национал проектру бартдигьаврилмур. Аьрасатнавугу, Дагъусттаннайгу национал проектру бартдигьлай бур 12 ххуллу- ххуттайх, 2019 шиная шинмай.

Республикалул каялувчинал тIимунийну, хьхьичIсса шиннардий му бутIуву тамансса сакиншиндарал давуртту дурну дур, хIадур бувну бур хасъсса норматив документру.
– Дагъусттан Республикалун, щала Аьрасатнан кунма, нацпроектру дузрайн дуккан даву приоритетсса давур. Нацпроектру хъанахъиссар лябуккулун кумагран хьхьичIунмай хъит учаву ва мунин ишла дувансса луртан. Амма му луртан жура цил багьайкун ишла дуллай буссару учин ттуща къахьунссар, – кунни Сергей Меликовлул .

[pullquote]– Дагъусттан Республикалун, щала Аьра­сатнан кунма, нацпроектру дузрайн ду­ккан даву приоритетсса давур. Нацпроектру хъанахъиссар лябуккулун кумагран хьхьичIунмай хъит учаву ва мунин ишла дувансса луртан. Амма му луртан жура цил багьайкун ишла дуллай буссару учин ттуща къахьунссар, – кунни Сергей Меликовлул .[/pullquote]

Дагъусттаннал БакIчинал тIимунийну, чIярусса арцу ишла дурну дакъар «Дуккаву», «Демография», «ЦIуллушиву дуруччаву» тIисса проектирдаву.
Проектирдал хъунмур мурад хъанахъиссар инсантурал оьрмулул даража лахъ баву. Амма гьашину, дукIумур шинах бурувгун, нацпроектирдансса арцу таман­сса чан дувантIий дур. Мукун­сса тагьар духьувкун, аьркинни къулагъас дуван арцу мюнпатну ишла даврих ва бюджетрал доходрал бутIа гьарза баврих.
«Жулва хьхьичI уттигу бав­цIунма бур ПаччахIлугърал хъус-хъиншиву мюнпатну ишла даврил масъала. Хаснува газораспределениялул объектру, аьрщарал участокру. Хъунна­сса луртан дур ттигу налогру дучIан даврил аралувугу – сайки 11,5 млрд къуруш. Нацпроектрал ччимур объектран арцу итадакьайссар шанма кIанавату: федерал бюджетравату, республикалул ва муниципал бюджетирттавату. Мунийн бувну гьармур цанницIун ца дарзуну дур. Нацпроектру дузрайн дуккан къадурссаксса, къахьунтIий бур бартбигьин бюджетрал харж хъана­хъимур бутIа. Цавай национал мурадру бакIуйн буккан баву хъар хъанай бур цайми дузал шаврийн», – кунни Сергей Меликовлул.