Дяъви тIисса мукъулла дур инсаннал дакIнил тIимулийх ришлай. Хъинну чIявусса баларду ялун биян бувссар «Авгъан дяъвилулгу». 1989-ку шинал февраль зурул 15-нний жула СССР-данул аьрал бувкссар Аьвгъаннава. Му кьинилия шиннай кIицI лаглай бур агьали та дяъвилий жагьилсса жанну кьурван дурминнал цIарду, дуллай бур аьпалул митингру. СаллатIнал дяъви язи къабугьай­ссар, учай. Буниялагу, саллатI – му Ватандалул бувсса амругу, бивхьусса буржгу биттур буллалисса инсан ур.
Вай гьантрай Ккуллал райондалул шяраваллал библиотекарттай, школарттай, культуралул къатраву хьунни ва кьинилун хас дурсса хьунабакьавуртту, мажлисру, дакIнин бичавуртту.

Райондалул библиотекалий

Най бунува кIицI буван ччива библиотекалул календарьданийсса цавагу таварих, байран, дата лях лаган къадитайшиву. Вана уттигу, Ваччиял школалул 8-мур ва 11-мур классир­ттал оьрчIащал архIал бувунни Авгъаннал дяъвилун хас був­сса мажлис. Бия библиотекалий бивхьуну Авгъаннал дяъвилиясса луттирду, чIирайн лавхъсса экрандалий ккаккан дуруна Авгъаннал дяъвилул лахIзардавасса суратру.
Мажлисрайн бувкIун бия Ккуллал шяраваллавусса чIя­вуми библиотекарттал каялувчитал, райондалул культуралул зузалт — Кьурбанов ХIабибуллагь ва Суллуев Муслим. Ия ши­ккува жула «Илчи» кказитрал хьхьичIунсса дус, макьалартту чичу, ЧIяйннал шяравасса Арсен Аьбдуллаевгу.
Гьай-гьай, мажлисрал хьхьи­чIунмину бия Авгъаннал дяъвилул гьурттучитал: Хъусращиял шяравасса Закарияев МахIаммад-ХIажи, Ккуллал шяравасса Магьдиев Аьли­кьади, Къяннал шяравасса МахIаммадов Исакь. Ия вайннащал Ккуллал райондалул Ветерантурал советрал председатель Загьидиев Аьбдулгу.
Авгъан дяъвилул гьурттучитурал бувсуна цанма та дяъвилий ккавккун бивкIмуния, биян бувсса балардая.
БатIаврий ккаккан дуруна му кьинилун хас дурсса чIири-хъунсса концертгу.
Яла школалул оьрчIал, чирахъругу лавхъун, дакIнин бивчуна жанну кьурван дурми. Мугу хъинну бюххансса зат бия.
Хьунабакьаврил ахирданий библиотекалул зузалтрал дяъвилул гьурттучитуран дуллуна багьлул ххирасса бахшишру.

Вихьлив

Вихьуллал шяраваллил Культуралул къатлуву хьунни Авгъан дяъвилия жула арсру шаппай бувкIсса кьинилун хас бувсса мажлис. Мажлисрай, личIи-личIисса аьрали яннардугу ларххун, гьуртту хъанай бия Вихьуллал школалул дуклаки оьрчIру: Кьурбанов АхIмад, Сулайманов Къараба, МахIмудиева Миясат, ХIажиев ХIажимурад, МахIмудиев Рамазан, Ясупиева Эльвира, Чупалаева Ххадижат, Оьмаров Алик.
Ия шиккун увкIун Авгъан дяъвилул гьурттучинал ппу ЧIанкIаев ЧIанкIа. Мажлисрай гьуртту хъанай бия Вихьуллал культуралул къатлул вакилтал ХIасанхIусайнова Рукьижат, Оьмариева Камилат, Бугъанова Заннишат.
Вихьуллал шярава та дяъвилий гьуртту хьуну ивкIссар урчIа жагьил: НухIов МихIа, Аьлиев Залкипри, Сулайманов МахIаммад, АхIмадов Сагид, ЧIанкIаев МахIаммад, Буттаев Залимхан, МахIаммадов Низами, МахIаммадов Аьлил, Оьмариев Александр.
Школалул оьрчIал, гьур­ттучитурал суратругу дургьуну, дурккуна дяъвилун хас дурсса назмурду.