Ларгсса нюжмардий Дагъусттаннал БакIчинал къуллугъ чIумуйну бартбигьлагьисса Сергей Меликов Республикалул Жагьилтурал центрданий хьунаавкьунни жагьилтурал ккураннал вакилтуращал, блогертуращал. Ванал найбунува бувчIин бунни ихтилат, совещаниялул зумувнусса бакъача, аьчухсса хьуншиврул, гьаннайсса, жагьилтурал дакIурдива щин хIачIаншиврул батIаву Жагьилтурал центрданий дуршиву.\
«Ттун жагьилтурал буруккинну, масъалартту цукунсса буссарив , социал сетирдай ми цукунсса масъалартту хьхьичIун ласлай буссарив кIул буван ччива, ми масъалартту бартбигьинсса чаранну лякъиншиврул», – увкунни Дагъусттаннал хъунаманал. Гьаз буллалисса масъаларттуми чIявуя: жагьилтурал тарбиялия, наркомантал гьарза хъанахъаврия, шагьрурду пух-пусурдануцIа, ччюрклицIа марцI буваврия, агьали марцIсса щинал дузал баврия, ххуллурдал къаххуйсса тагьардания, строительствалул низам, кьарал къадурурччуну дуллалисса стройкардая. Экологиялул суаллу сукку бувайхту, Меликовлул бувчIин бунни ххиличIрурду ххилаххаврил масъала ца кьини щаллу буван шайсса масъала бакъашиву, ччюрклицIа шагьру марцI буваврил даву чIал къархьуну сантирайн дагьантIишиву, муниха зий бушиву.
«Волонтёртал-медиктал» штабрал координатор Карина Бамматмурзаевал хасну волонтёртуран аьркинмур лахьхьин буллансса кIану ккаккан буван къабучIиссарив тIисса тавакъюлун жаваб дуллай, Меликовлул бувсунни му иширан кабакьу бувантIишиву. Мукунма Жагьилтурал хIукуматрал (Открытое молодёжное правительство) хъунаманал волонтёртуран мероприятияртту дуллансса кIанттул хIакъиравусса суалданухьхьун жаваб дуллай, бувсунни оьрчIансса лагерьдаву къазузиссагу бушиву, микку цумур къулайсса бурив ххал бувну, волонтёртурал штабрахьхьун булунсса чаран ккаккантIишиву. Ахирданий хьхьичIунминнан ХIурматрал грамотартту, Барчаллагьрал чагъарду буллуна. КIицI лаганна ва хьунабакьаву Дагъусттаннал БакIчинал Инстаграмрайсса официал страницалий тIайланнасса эфирданийгу ккаккан дуршиву.
