Февральданул 17-нний ДР-лул БакIчи Сергей Меликовлул каялувшиврий Дагъусттаннал ХIукуматрал батIаврий ххал бивгьунни 2021-шинайнсса республикалул бюджет бартбигьаврил масъалартту.
Бюджетрал харж шаймур бутIа хъанай бур 159,6 млрд къуруш
ДР-лул минфиндалул бакIчи Юнус Сяъдуевлул тIимунийну, республикалул кассардая дузал хьумур бюджет февральданул 1-нний хъанай бур 350 млн къуруш. Бюджетрал доходирттал агьаммур бакIщаращул — налогирттал ва налограл дакъами дучIияртту гьашинусса шинан цIакь дурну дур 38 млрд ва 379 млн къуруш.
« 2021 шинал январьданий республикалул бюджетравун дуркIунни 1 млрд ва 270 млн къуруш, диял хъанай дакъар 501,9 млн къуруш. Налограл бурж январьданул 1-нний хIисавну бия 11,5 млрд къуруш.
Бюджетрал харж шаймур бутIа хъанай бур 159,6 млрд къуруш», – кунни министрнал. Мунал бувсунни мукунма ишла дурми ва аьркин къадурми арцул хIакъиравугу.
Сергей Меликовлул финансирттал министрнахьхьун суал буллунни, бюджетрал арцу дучIи къадаврия республикалун биян бюхъайсса заралданул хIакъираву. Республикалун биян бюхъайсса щавщи чIиви личIан баншиврул, республикалул каялувчинал тапшур бунни, мартрал 10-ннийнин циняв министерстварттан предложенияртту хIадур дуван ДР- лул парламентрай ххал дигьин ва бюджетраву аьркинсса дахханашивуртту дуван.
