[dropcap]Ф[/dropcap]евраль зурул 8-нний Аьрасатнаву кIицI лагай Элмулул кьини. Ва кьини пишалул байранну хъанахъисса, элмулул ххуллий хьхьичIуннайшивуртту дурсса цIадурксса аьлимтал жул шяравугу чансса бакъар. Миннавасса цагу хъанай бур цила оьрмулул хъунмур бутIа кIулшивуртту дулаврил, элмулул ххуллий гьан бувсса лавайсса даражалул пишакар, техникалул элмурдал кандидат Магьдиева (Акиева) Музагьиб Набинал душ.
Шиккува кIицI лаган, Музагьиблул нину-ппу Наби ва Майминат шяраву бусравсса инсантал бивкIссар. Ва хъамал ххирасса, тачIав бухху-букку чан къашайсса къуш бивкIссар. ЯхI-къириятрал увччусса, инсаннал буруккин лаласун кIулсса, кумаг аьркиннал чIарав ацIан анавар уккайсса Набинал цIа хIакьинугу зумату щяв къадишай ва кIулминнал.
Набинал мукьвагу душнива Музагьиб чIанма-чIивимур бур. Бувну бур Музагьиб 1938 шинал Ккурккуллал шяраву, арулва оьрчI бусса кулпатраву. Ккурккуллал дянивмур даражалул школагу къуртал бувну, бувххун бур Дагъусттаннал паччахIлугърал университетравун, инженер-технологтал хIадур байсса факультетрайн.
Му къуртал бувну махъ, университетрал тIайла бувккун, зун лавгун бур Молдавиянавун. Зий бивкIун бур Тирасполь шагьрулийсса Консервный комбинатрай инженер-технологну.
1966-ку шинал зун бивкIун бур Дагъусттаннал дуки-хIачIиялул промышленностьрал научно-исследовательский институтраву хъунмур элмийсса зузалану.
1969 шинал бувххун бур Краснодардал политехнический институтрал аспирантуралувун. Лайкьну дурурччуну дур техникалул элмурдал кандидатнал цIа ласунсса диссертация.
1976-1992-ку шиннардий ва зий бивкIун бур Дагъусттаннал университетрал Совет машлул факультетрай кафедралул доцентну.
Мунияр махъ Дагъусттаннал техникалул университетраву Менеджментрал кафедралий.
Аьмну 55 шин хьуну дур ванил студентътурахь дарс дихьлай. Цаппара ванил студентъталгу, элмулул ххуллийх лавгун, элмулул доктортал хьуну бур, цаппарасса жаваблувсса къуллугъирттай бур. Музагьиблул ххюцIалунния лирчусса элмийсса разработкартту дурккун дур личIи-личIисса элмийсса журналлай ва кказитирттай. КIулшивуртту дулаврил ва элмулул ххуллий бивхьусса захIматрахлу ва лайкь хьуну бур Дагъусттаннал ХIукуматрал чулухасса наградарттан. Музагьиб ЗахIматрал ветеранни.
ДакI хъинсса, хIал бавкьусса, тIайлашиву ччисса Музагьиблул хIурмат хъунмасса бур ва зий бивкIсса кIивагу университетрал студентътурачIа ва преподавательтурачIа. Ххаллилсса агьлу-авладрал душ бунува, дуккавриву, давриву хьхьичIунсса бунува, вайми уссурссуннаву кунма, ванивугу бакъар пахру-ххара, хъун хъанахъаву. Ва бур гьарнащал хIал бавкьусса инсан. Шяраваллил жяматрачIагу ванил хIурмат хъунмасса бур. Студентътурал иш-тагьар дурчIин ччисса, махъун багьлагьиминнан кумаг бан анавар буккайсса преподаватель бия цуппагу. Цаманан кумаг бан, чIарав бацIан анавар буккаву вайннал кулпатравусса цинявннал хасиятри, нитти-буттая тIайла хьуну, оьрчIайн бияннин.
Нажагьсса бухьунссар Дагъусттаннай хьхьичIмур никирал инсантураву Музагьиблул ссу, цIанихсса хъаннил хIакин, медициналул элмурдал доктор, профессор Зайдиева (Магьдиева) Загьидат Набиевна къакIулсса. Щалагу Дагъусттанная, чIаравсса республикардаягума ванил цIа дургьуну бучIайссия хъами. Цинявппа, буруккин бувккун, рязину лагайссия. Мукуна ххуйну кIулссар жула халкьуннан чIярусса шиннардий Дагъусттаннал геологтурал экспедициялул хъунаману ивкIсса, РСФСР-нул лайкь хьусса геолог Музагьиблул уссу Бустамин Магьдиев.
Цила ласнащал, Гъумучатусса АькIиев Юсуплущал, Музагьиблул тарбия бувну бур кIива ххаллилсса душ. Диана (Джанна) АькIиевал къуртал бувну бур Дагъусттаннал педуниверситетрал графикалул факультет. Сурат дишаврил гьунар бусса душ бур. Му бакъассагу, ванил къуртал бувну бур Москавуллал тIивтIусса социал университетрал психологиялул факультет. КIилчинмур душнил Икьремал къуртал бувну бур Дагъусттаннал университетрал чил билаятирттал мазурдил факультет. Мукунма Дагъусттаннал техникалул университетрал паччахIлугърал ва муниципал управлениялул пишакартал шайсса факультет. Душругу, ниттиха, агьлу-авладраха лавхьхьусса, гьунар бусса бур.
Цалчинмур ташулиясса Музагьиблул арс Эльдар FCF-ММА-лул лайкь хьусса мастерди. Таганрог шагьрулий ва журалул спортрал школа тIивтIуну, муний каялувшиву дуллай ур. ЦIана Музагьиб оьрчIругу, оьрчIал оьрчIругу лагма лавгун, миннал ххари буллай бур.
ЦIуллушиву дулуннав вихьхьунгу, щала вил кулпатрахьхьунгу, хIурмат бусса Музагьиб Набиевна. Ина кунмасса аьлимтал чан къабаннав Аьрасатнал элмулул сфералуву.
