Февраль зурул 15-нний МахIачкъалалив хьунни Авгъаннал билаятрай аьрали бурж лахълай бивкIсса дагъусттанлувтал дакIнин бичлачисса мероприятие. Ванил сакиншинначитал хьунни Аьрасатнал аьралуннал ва тарихрал обществалул региондалул отделениялул активистал. Вайннан кабакьу бунни Дагъусттаннал Миллатрал политикалул ва диндалул иширттал министерствалул. Шикку ихтилат бунни миллатрал политикалул министрнал хъиривчу Гьарун Давыдовлул.
– ХIакьинусса мероприятиялул мурад бур чил билаятирттай аьрали бурж лахълай, дяъвилул иширттаву гьуртту хьусса интернационалистал дакIнин бичаву, лахъа-хъун баву. Вай чил билаятирттай жула хIукуматрал мурадру буручлайри бивкIсса. Жува паракьатну оьрму бутланшиврул вайннал цала жандалий хIайп къаувкуссар, – увкунни ванал ва оьвчаву дунни жагьилминнайн буттахъал къучагъшивуртту дакIний ритияра ва миннал аьпа буруччияра куну.
Ихтилатру къуртал хьуну махъ интернационалистурал гьайкалдануцI дирхьунни тIутIив.
