Национал политикалул министерствалийсса хьунабакьаву

Февраль зурул 15-нний, чил билаятирттай аьрали бурж лахълай бивкIсса аьрасатлувтал дакIнин бичайсса кьини, Да­гъусттаннал Национал политикалул министерствалий хьунни авгъан дяъвилул гьурттучитуращалсса хьунабакьаву. Шикку гьуртту хьунни Дагъусттаннал миллатрал политикалул ва диндалул иширттал министр, Аьрасатнал аьралуннал ва тарихрал обществалул региондалул отделениялул председатель Энрик Муслимов, Авгъанисттаннал ветерантурал МахIачкъалаллал советрал каялувчи Аьлисултан Аьлисултанов, ванал хъиривчу Зиявуттин Аьбдуллаев, министерствалул зузалт.

Энрик Муслимовлул барча бунни авгъан дяъвилул ветерантал Интернационалистнал кьинилущал ва барчаллагь увкунни захIматсса шартIирдай дакI марцIну къуллугъ буллай бивкIун тIий.
– ЦIана сийлувун багьну бур хъуннасса агьамшиву диркIсса политикалул хIукмурду щак-щуклихун бичлачаву. Жунма, гьай- гьай, бувчIлай бур, тай иширттавух хIала буххан, гьуртту хьун аьркинну бивкIшиву. ХьхьичIва-хьхьичI, жула па­ччахI­лугърал дазурду дуруччаву мурадрай. Багьа бищун къашайссар Совет Союзрал авгъаннал халкьуннал экономика гьаз дан, культура хьхьичIуннай дан бивхьусса захIматран. Совет ­аьрал буккан бувну махъ Авгъаннаву цикссагу ххишала хьуссар давуртту дакъами, гьаз хьу­ссар наркотикру буккан баву ва ппив баву, – кIицI лавгунни цала ихтилатраву Энрик Муслимовлул.
Зиявуттин Аьбдуллаевлул бувсунни Ккавкказнал республикардаву Авгъан дяъвилий гьуртту хьуминнал ва ливтIуминнал чулуха Дагъусттан цалчин бушиву.
Хьунабакьаврий маслихIат ккавккунни Авгъаннал ветерантуращал цачIу наркоманиялун ххуллу кьукьинсса, жагьилми ватан ххирану тарбия бансса давуртту дуллан.
Министерствалул отделданул хъунмур Хасайбат Валиевал бувсунни Дагъусттаннал Миллатирттал политикалул министерствалул кабакьулийну Авгъан дяъвилул гьурттучитурал, Совет Союзрал Виричу Абас Исрапиловлул ва Аьрасатнал Виричу Нухидин ХIажиевлул цIарду щалагу Аьрасатнал Хъамакъабитулул электрон луттирайн ласунтIишиву.