Февральданул 16-нний ДР-лул культуралул министр Зарема Буттаевал кьамул унни личIи-личIисса масъаларттащалсса 9 инсан.
ОьрчIал балетрал студиялул каялувчи Камила Гъазиева бувкIун бия отчетрал концертрансса зал булара тIисса тавакъюращал. Р. ХIамзатовлул «Асият» поэмалийн бувсса балетраву вай оьрчIал дурсса хьхьичIунсса гьурттушиннагу кIицI ларгун, министрнал махъ буллунни ва масъала щаллу бавриву кабакьу бувансса.
КъавтIаврил Каспийскалиясса «Арс» цIанилусса оьрчIал коллективрал каялувчи Шамил Аьбдуллаев увкIун ия мукунмасса масъалалущал. Ванал бувсуна кIира шин ва дачIиннул дянив цалва коллектив цимивагу шагьрулийн бившиву ва цимилгу хьхьичIунсса кIанттурду бувгьушиву. Мунайн ва мунал каялувшиндаралусса коллективрайн творчествалул конкурсирттай ххув хьусса оьрчIащал ва миннал педагогтуращал шинай цал шайсса хьунабакьаврийнгу оьвкуну, министрнал махъ буллунни щаллу буван багьлагьисса масъалалул ялув шаймур буван. Шамил Аьбдуллаевлул мукунма министрнахь бувсунни Дагъусттаннай Ккавкказуллал къавтIаврил конкурс бувансса сипта душиврия, щалагу Ухссавнил Ккавкказуллаясса гьурттучитурайнгу оьвкуну. Зарема Буттаевал махъ буллунни ва давривугу шайсса кабакьу буван.
Ва кьини министрначIан бувкIун бия Дагъусттаннал опералул ва балетрал театрданул артистътал Диана Октавиан ва Денис Федоренко ва цаймигу инсантал, ялапар хъанансса къатрал, даврийн буххаврил ва цайми-цаймигу масъаларттащал.
