Февральданул 12-нний Лакрал театрданул тамашачитурал хьхьичIун лавсунни «Хъамалу оьвчаву» тIисса цIусса пьеса. Ва бур, 1953-ку шинал «Ленфильм» киностудиялий лавсъсса «Званый ужин» тIисса къямадиялул сюжет гьануну лавсун, режиссер-постановщик МахIаммад-Аьрип Сурхатиловлул бивхьусса пьеса.

Пьесалуву агьамми рольлу дургьуну бур Шамсуттин Къапланов ва Саният Рамазанова, гьурттуну бур ХIажиаьли ХIажиаьлиев, ПатIимат Давидова, Рамил Кьур­бан­махIаммадов, Рукьижат МахIаммадова, Олеся Щепилова ва Жамиля Закарияева.
Художник-постановщик – ДР-лул культуралул лайкь хьусса зузала МахIаммад ХIусайнов.
Пьесалувусса балайрдансса махъру ва макьанну чирчуну дур Арслан Шагьмардановлул.
КъавтIавурттал постановка – Наргиз Давидовал. Пьесалул текст оьрусрая лаккунайн бувцуну бур Зулайхат Тахакьаевал.
ЦIанасса, инсантурал бакIру лагма-ялтту хъанахъимунилгу, буруккинналгу кIу лаган бувсса, заманнай, оьрмулувугу, интернетравугу укунмавагу дакIру къумалаган дуванмур, оьмур чIявусса чIумал, укун куклусса, инсантурал бакIругу, дакIругу аьчух дуккан дувансса, хъян­сса пьесарду чара бакъа аьркинни. Ва хьхьуну залданувусса тамашачиталгу макьру дачиннин хъяй бия.
Лакрал театрдануву зун бувкIсса жагьилсса актриса Жамиля Закарияева буслай бур:
– ХIакьинунингу на сахI­налийн, тамашачитурал хьхьи­чIун бувкнугу, ва, чIирисса дунугу, ттуллалусса щаллусса цалчинсса роль хъанай дур. Режиссернал, уртакьтурал биялалийн бувну, репетициярттугу хъинну хIазсса, куклусса дия, цурда ва давугу хъинну ххуй дирзунни. Ттул пикри бия тамашачитурал нава цукун хьунабакьинавав, тIисса. Ттун, циваннив, ттула уртакьтуралми образру хIазну чIалай дия ттулламурнияр. На бяйкьлай бивкIун бияв, на тIимунилгу, дуллалимунилгу тамашачитал тяхъа буккан бувна, – тIий, буслай бур Жамиля.