Аьрасатнал хьхьичIунсса авиакомпаниярттай зузисса, итххявхсса летчиктуравух хьхьичIунну бур цикссагу дагъусттанлувтал. Вай гьантрай жул редакциялул хъамаличуну хьунни «ЮТэйр» авиакомпаниялул пилот, Хъусращиял шяравасса НурмахIаммадов Ширвани Аьвдуразакьлул арс.
– Акъахьунссар оьрчIну уний гьаваллавун леххансса гъира къабивкIсса цаягу жагьил. Ширваний, оьрчIнийва буссияв вин летчик хьунсса хиял?
– ТIайламур бусан, на икIайссияв хIакин хьунна тIисса пикрирдай. ХьхьичIунсса хIасиллащал Каспийскаллал 7-мур гимназиягу къуртал бувну, хIадур хьуну уссияв Мединститутравун уххан. Школалий дуклайсса чIумал ттул буссия летчиктал хьусса, ттуярва оьрмулул хъунисса дустал. Миннал, ттухь летчиктурал оьрмулия ва даврия буслай, ттувунгу летчик хьунсса гьавас бувтуна. Дуклан уххавриясса ттула пикри баххана хьушиву бусан лавгра буттачIан, укунсса иш бур ци бави, тIий.
Бутталгу, ттуцIун авкьуну, винма ччимур бува куну рязий хьуна. Дузал бувну документругу, лавгра Актюбинскаллал Граждан авиациялул лаваймур летный училищалувун дуклан уххан. Приемный комиссиялул даву дайдишин кIива- шанма гьантлул хьхьичI ивну ияв на тиккун. Училищалувун цалчин документругу буллуну, хьхьу-кьини дакъа хIадур хъанай ивкIра экзаменнайн. Тиккугу тайва дустурал, ттущал дарсру дуллай, экзаменнайн на хIадур уллай, хъунмасса кумаг бувна. Гьай-гьай, дуккаврицIун, спортрал чулухунайгу итххявхсса ушиву ттун хъинну дучIи ляркъуна.
Та ппурттуву Актюбинскаллал летный училищалуву дуклай бия Дагъусттанная бувкIсса тамансса жагьилтал. Летчиктурал пиша жагьилтурал дянив хъинну сийлуву бусса чIунну дия тай.
– Цукун бакIрайн агьра ина «ЮТэйр» авиакомпаниялий зун?
– Училище къуртал бувну махъ, самолетирттай леххан ихтияр дулун хьхьичI, дуссар летчиктуран леххан ккаккан дурсса ссятру. Сивсуну леххан лавхьхьуну махъ, на зий айивхьура Дагъусттаннал авиалиниярттайсса Ххассалбувултрал къуллугърал летный отрядраву. Муния махъ, Ан-2 самолетрая айивхьуну, Ту-134, Ту-154 самолетирттай лехлан ивкIра.
2011 шинал аэропортрай хьусса дахханашивурттацIун бавхIуну, цинявппа шикку зий бивкIсса летчиктал Аьрасатнал личIи-личIисса авиакомпаниярттайх ппив хьуна. Мукун нагу бакIрайн агьунав Москавливсса «ЮТэйр» авиакомпаниялийн. Аьрасатнаву ва авиакомпания дур хьхьичIунсса ва хъунисса авиакомпаниярттавасса ца. Ва авиакомпаниялул самолетру ва вертолетру дусса хъунисса паркру буссар Санк-Петербурглив, Краснодардай, Сургутлив, Тюменнай, Самаралий, Ростоврай ва цаймигу Аьрасатнал регионнай.
Авиакомпаниялийн кьамул бувсса летчиктурал чулухуннай дур хъунисса тIалавшиннарду. Нагу, дахьа шиккун кьамул айхту, гьан унна Палангнаву Боинг -737 самолетирттай леххаврил квалификация гьаз дан. Муния шинай, хIакьинусса кьининин зий ура ва компаниялий пилотну. «ЮТэйр» авиакомпаниялий Боинг, Эйрбас самолетирттал командирталну зий бур Дагъусттаннаясса тамансса летчиктал.
– Винна яла лехлан гъира буми рейсру цуми дур?
– Аьрасатнал шагьрурдайн, Европанавун, Кьилвалул билаятирттайн ияннин лекъавхсса паччахIлугъру къархьухьунссар ттул. Амма ттулла яла дакI ххари хьунсса рейсру на ккалли дара МахIачкъалалийн, Дагъусттаннайнсса. Хаснува зунттал щархъавун – Гъумукун, Ваччав, Гъунив, Бущихъав, Лаващав, Ахттав ва цаймигу шяраваллавун лехлахисса чIумал, ссавруннал лахъния зунттах уруглай, тIабиаьтрал караматшиврул ясир къаувсса цуппа ца лахIза къашайва. Дагъусттаннал аьрщарай кунма дакI тIиртIусса, хъамал ххирасса, кувннах кув ччаву дусса миллатру хIисав къашай цайми билаятирттай. ЦIанакулгу ччя-ччяни дакIнийн багьлан бикIай, Ан-2 самолетрай зунттавунсса тIабиаьтрал караматрал, марцIсса гьавалул ясир увсса, кIарттул ччатIул кьанкь ришлашисса Лакку билаятрайнсса аьрххи.Тай чIунну на ккалли дара ттула оьрмулувусса ва ттула давривусса ца яла талихI бумину.
– Ширваний, пандемия сававну тамансса зараллу ва дайшишрурду хьунни хъунисса предприятиярттан. Цукун зий дур зул авиакомпания пандемиялул шартIирдаву?
– Гьай-гьай, пандемиялул зараллу хьхьичIва-хьхьичI асар хьунни жул авиакомпаниялунгу. ДацIан дунни чIумуйнусса чил билаятирттайнсса рейсру. Мунийн бувну чан хьунни рейсру, муницIунма бавхIуну чан бунни зузалтрансса харжругу. Опыт бусса, итххявхсса пишакартал бусса хъунмасса коллектив ябаву мурадрай, цинявннан цасса харжру буллансса хIукму бунни.
– Барчаллагь Ширваний, вингу, авиакомпаниялий вищалва зузиминнангу, гьаваллавугу, аьрщарайгу тIайлабацIуртту хьуннав.
P.S. Декабрь зурул 27-нний кIицI ларгунни Ххассалбувултрал къуллугърал пишалул байран. Сант дирирну дуна барча бан ччай ура ттущала архIал аэропортрай ва къуллугърай зий бивкIсса ва цIанакулсса чIумалгу пассажиртурал мюхчаншиву дуруччаврил къаралданий бавцIусса ттулва коллегахъул, жулва лакку оьрчIру – Сулайманов Марат, Аьлилов АхIмад, ХIанапиев КьурбанмахIаммад, Исяев Расул, Сулайманов Мурад, Аьлибагов Аьлибаг, Сяидов АьлимахIаммад ва Рабаданова Забидат. Аэропортрай иш багьсса чIумал, секундирттал дянив, мугьлат бакъасса мутталий тIайласса хIукму бувну, инсантуран кумаг бан хIадурну къаралданий бавцIуну буссар. Ва къуллугърай, укун тивталсса командалуву зий хьуссар ттул 10-хъул шинну. Ххассалбувулт, альпинистал, щинавун бучIулт, парашютистал медициналул цалчинсса кумагру бан кIулсса, гьарица чулухунмай итххявхсса пишакарталли. ЧIа тIий ура цинявннан цIуллушиву, давриву тIайлабацIуртту ва дунияллий паракьатшиву.
Ихтилат бувссар
Имара Саидовал
