Январьданул 15-нний, 16:00 ссятраву, Дагъусттаннал Художниктурал союзрал залдануву хьунтIиссар «Дагъусттаннал щаращив» цIанилусса Республикалул декоратив-прикладной ва изобразительный искусствалул выставка.
Мунил сакиншинначиталну бур ДР-лул Культуралул министерство, Республикалул Халкьуннал творчествалул къатта. Выставка хьунтIиссар Дагъусттан Республикалул Художниктурал союзрал кабакьаврийну, Республикалул «Самородки» тIисса проектрал лагрулий.
Ккаккиялий дикIантIиссар халкьуннал художествалул промыслирдал усттартурал каруннил дурсса 150-нния лирчусса даву: щаршсса, дурурххусса, бартбисуртту, чIюлушиннарду (кIисри, канишру), тIахIни-кIичIу, миллатирттал яннардавусса ссихьри ва чIярусса цаймигу, уттинин республикалул, региондалул ва дунияллул халкьуннал дянивсса лагрулул фестиваллай, ярмаркардай, выставкардай дирхьусса караматсса затру.
Ялату ларгсса шинал ва журалул 10-нния лирчусса выставка хьуссар, жулва халкьуннал захIмат ххирашиву, гьунарду ккаккан буллалисса.
«Дагъусттаннал щаращив» выставкалий гьуртту хьунтIиссар ДР-лул ХIукуматрал «Душа Дагестана» тIисса премиялул лауреатътал: Ахъушиял райондалиясса Абакар ГъазимахIаммадов, Ккуллал райондалиясса Марина Ибрагьимова, Бущихъиял райондалиясса ИбрагьимхIажи Аьлиев, Буйнакскаллал райондалиясса Жамина Шугаибова, Къайтагъуллал райондалиясса Зубайдат ХIасанова ва чIявусса цаймигу.
Выставкалул лагрулий хьунтIиссар халкьуннал канил пишардал мастер-классру.
Выставка лахъи лагантIиссар январьданул 30-ннин.
