Лакрал театр зий байбивхьуния шиннай 2020 шинал там хьуссар 85 шин.
[dropcap]Э[/dropcap]пидемиологиялул жапасса тагьар сававну, ва агьамсса кьини чIарах дурккун ларгун, юбилейрал шинал дан дакIнийсса давурттугу махъун дичин багьну бия.
Юбилейран хасну театр дуллай бур миллатрал драматургиялул фестиваль. Муний ккаккан бан тIий бур театрданул репертуардануву яла язиминнул ххуттайсса спектакллу.
Фестиваль тIитIлатIисса шадлугъ хьунни ларгсса нюжмаркьини.
Тамашачитал барчагу бувну, театрданул каялувчи Бадрижат МахIаммадхIажиевал, завлит Гулизар Султановал ва хъунама режиссер Аслан МахIаммадовлул бувсунни махъсса шиннардийсса театрданул хьхьичIуннайшивурттая, кIицI лавгунни лув-ялув кIира шинал (2019-2020 ш.) билаятрай зузисса кIиттуршва миллатрал театрданул дянив яла хьхьичIунсса ацIния мукьва театрданул сияхIраву жула театр лавайсса ххуллу-ххуттай бивхьушиву.
Бувсунни гьашину зун тIий бушиву театрданул репертуардануву агьамсса кIанттурду бувгьусса спектакллу «ПартIу ПатIима», «ЛухIи кьини», «Хан Муртазааьли», «БурцIурдил хъатIи» цIу буккан бавриха.
КIицI лавгунни хIакьину театрданул хьхьичI бавцIусса мурадру ва масъалартту.
ХьхьичIунсса артистурал аьпалун
2019 шинал, Театрданул шинан хасну, Лакрал театр ччаннай бацIан баврил бакIщаращуй бивкIсса ва му хьхьичIунмай баврил цIаний хъунмасса захIмат бивхьусса бусравсса артистурал аьпалун театрданул каялувчитурал ккаккан дурунни премияртту: Аьрасатнал лайкь хьусса артистурал МахIаммад Мусалаевлул ва Шагьун Ибрагьимовал, Садикь МахIаммадовлул, Аьрасатнал магьирлугърал бусравсса ишккакку Валерий Эфендиевлул цIанийсса.
МахIаммад Мусалаевлул цIанийсса «Шинал артист» тIисса премиялун 2019 шинал лайкь хьунни Дагъусттаннал халкьуннал артист Аслан МахIаммадов. «Театрданул ас ва къирият» тIисса премиялун лайкь хьунни Артур Абачараев.
Н. Гоголлул «Ревизор» спектакльданухлу «Яла язимур адаминал роль» ва «Яла язимур хъамитайпалул роль» премиярттан лайкь хьунни Шамсуттин Къапланов, Саният Рамазанова, МахIаммад Сурхатилов, Зинаида Чавтараева. 2020 шинал артистуран премияртту дуллунни Мариян Илиясовал цIанийсса «Дараччи» фондрал кабакьаврицIух У. Шекспирдул «Тарс мютIи баву» спектакльданухлу. «Яла язимур адаминал роль» ва «Яла язимур хъамитайпалул роль» премиярттан лайкь хьунни Ибрагьим Мусиев, Зинаида Чавтараева, Артур Абачараев, Зульфия Архилаева. КIилчинмур пландалул роллахлу премиярттан лайкь хьунни Ислам МахIаммадов, Сухраб Шуаьев, Кьурбан Шабанов, Руслан Ларин, Мариян Шихамирова, Рукьижат МахIаммадова.
Пахру бансса иш бакъаривла, премиярттан лайкь хьусса артистурал дянив чIявуми жагьилсса бушиву.
Махъсса шиннардий театрдануву зун увкIунни билаятрал хьхьичIунсса театрал институтру къуртал бувсса шама артист: Руслан Ларин, Аьзиза АхIмадова (ГИТИС), Кьурбан Шабанов (Щукиннул цIанийсса театрал институт).
Мариян Илиясовал цIанийсса премия
«Дараччи» фондрал ккаккан дурунни ккуран сакин дурсса, жунма тачIав дакIния къабуккантIисса Мариян Илиясовал цIанийсса премия — «Адав ва къирият» тIисса.
Цалчинна-цалчин ва премия ласун нясивну ляркъунни Дагъусттаннал халкьуннал артистка Луиза Шагьдилован.
Миллатрал драматургиялул фестиваль тIитIлатIисса шадлугърай фондрал каялувчи Гульшан Хасаевал ва Марияннул арс, МахIачкъала шагьрулул депутатътурал мажлисрал хъунама Марис Илиясовлул.
Премия дуллай, Гульшан Хасаевал кIицI лавгунни Мариян Илиясовал гьану бивзсса «Дараччи» ккуран зий диркIшиву лакрал миллатрал маз, магьирлугъ ва аьдатру ядаврил цIаний. Илиясовхъал кулпатращал цачIуну фондрал хIукму бувну бур Мариян Илиясовал цIанийсса премия «Адав ва къирият» гьарца шинал дуллан лакрал миллатрал маз ва магьирлугъ дуруччаврил цIаний дакI марцIну зузисса инсантуран.
Цалчинсса премия дулун Луиза Шагьдиловал цIа, Гулшан Хасаевал бусаврийн бувну, рирщуну дур «Дараччи» ккуран лярхъуния шинмай гьарца мунил батIавуртту чIюлу дуллай бивкIун тIий.
«Къалайчитал» — дагъусттаннал цалчинсса пьеса
Миллатрал драматургиялул фестиваль Лакрал театрданул тIиртIунни дагъусттаннал цалчинсса драмалийну.
ДакIнийн бутанну, А. Къапиевлул цIанийсса Лакрал паччахIлугърал музыкалул ва драмалул театрданул мархри най бур 1914 шинал Гъумучиял интеллигенциялул сакин дурсса «ЦIубарз» тIисса кружокрая шихунмай. Та шинал кружокрал ккаккан бувну бур дагъусттаннал цалчинсса драма, Гь.Саэдовлул «Къалайчитал», лакрал хIалтухантурал захIматсса оьрмулия бусласисса.
1935 шинал Дагъусттаннал АССР-данул Обкомрал ва Совнаркомрал хIукмулийну тIивтIуну бур А. Къапиевлул цIанийсса Лакрал паччахIлугърал драмалул театр. Му тIитIлатIисса кьини ккаккан бувну бур спектакль «Къалайчитал».Тания шинмай чIумуя-чIумуйн бихьлай бивкIун бур ва спектакль.
«Къалайчитал» бур лакрал хIалтIухантурал гъурбатрайсса бигьа бакъасса оьрмулиясса, яиттарцIансса усттартурал рахIму бакъа цахава зузи буллай бивкIсса къалайчитурал оьрмулиясса пьеса», – увкуну бур Апанни Къапиевлул.
Социал оьрмулувусса тIайладакъашиву, аваданшиврухсса къанихшиву, арцуйн иман дишаву – вай мяърипатран ххуллу кьукьлакьисса оьрмулухунсса суаллу сукку бувну бур Гьарун Саэдовлул цала пьесалуву.
Классикалул пьеса ттизаманнул ххуллу-ххуттай цIубуккан бувну бивхьунни Москавлиясса режиссер, Гьарун Саэдовлул ссил арснал душ ПатIи МахIачевал. Пьесалувусса ишру режиссернал чан-кьанну бавхIуну бур хIакьинусса кьинилуцIун, мунийну произведениялул агьамшиву жула заманнайгу хъуннасса душиврий чIурчIав дуллай.
Пьесалуву хъанахъимуницIун бавкьусса халкьуннал шеърирдал ва музыкалул биян буллай бур лавгмур ва хIакьмур цанния ца батIул бан къашайсса бушивриясса асар.
ГьунчIукьатIрал ккуран «Къалайчитал» спектакльданий
ГьунчIукьатIрал жяматрал ккуран дур чIярусса шиннардил мутталий цала щарнил иширттавугу агьамсса кIану бугьлагьисса, лакрал миллатрал иширттаягу ятну къадацIайсса ккуран. БучIай ванил вакилтал Лакрал театрданул мероприятиярттайнгу. БувкIун бия ми ва базилухгу «Къалайчитал» спектакль ххал бан.
«Илчи» кказитрал хъунама редакторнал хъиривчу Руслан Къардашовлул бусласимунийн бувну, театрданувунсса культпоходрал сиптачи хьуну ур ккурандалул каялувчи ХIажибутта ХIусайнов.
– Ттун ххуй бивзунни театрданувунсса культпоходгу, «Къалайчиталгу». Вана уттигу ХIажибутта ккурандалул вакилтурайн оьвтIий ур «Ккурккуллал Щаза» спектакль ххал бан. «Театрданувун занан аьркинссару, чIарав бацIлан аьркинссару, му миллатрал мазгу, магьирлугъгу ядаврил цIаний зузисса идара буну тIий», – тIий ур жул хIурмат лавайсса шяравучу. На мунацIун акьлай ура. Театрданул администрациялун маслихIат бавияв театрданувун занансса абонемент бан, гьарца спектакльданийн учIан къахьурчагу, на му ласувияв, театрданунсса кумагран. Му бакъасса, чансса бухьурчагу, бурхха жула дянив театр ххирасса, цавагу спектакль лях гьан къабитайсса тамашачитал, миннангу абонемент къулайну бикIанссар, – тIий ур Руслан Къардашов.
– Мариян Илиясоващал кIул хьуну махъ ччя-ччяни бакIрайн багьайвав на ва жяматрал дянив. ХIайранну бикIара вайннал агьлу цаннал ца хIурмат бусса, кувннал кув бувгьусса, цала шяравалугу, щала Аьрасатгу ххирасса бушиврий. ХIакьину ккурандалул вакилтал театрданувун бучIавугу цайми шяраваллансса эбратну хьун аьркинссар, – увкунни «Дараччи» фондрал каялувчи Гульшан Хасаевал.
