Гьармудангу «високосный» шин агьалинал ссавур ххал дуллалисса, хIал ккаклакисса шинни тIун бикIай. 2020 шинал ссавур дуван багьлагьисса, дукъарну чара бакъасса кIанттурдугу, ишругу чIявусса бия. Кувний, бан-бит бакъашиву ялтту дурккун, пашманну пахъ багьну бацIан багьайва жунма. Укун пахъ багьну, банд лавгун ливчIунав на, Дагъусттаннал медициналул университетрал хIаятраву цIуну тIиртIусса гьайкалданийн ябияйхту.

Буслай бусан къашайсса кьурчIишиву, къюву, багьтIатIал шаву дия бакIгу карунниву кIучI дурну щяивкIсса медикнал скульптуралуву. Ччай бия ганал чIарав щябикIан, ганал хъачIрай ка дирхьуну бакI гьаз дуван уван, дакI данмур бусан. Укун тIий чигу чивчуссия на Фейсбукрайсса ттулламур ар-майданнив. Хар-хавар бакъа ва оьсса шинал ххуллухъиндаран ттун дурна хъинсса бахшиш: та скульптуралущалсса ттул текстрал репостру дуллай булувкьуна халкь, шанма гьантлул дянив 500 инсаннал репост дурна, Аьрасатнал циняв регионная, Эстониянава, Украиннава, Туркнава, Американава , гьаннайсса, дунияллул гьарцагу мурцIния гьайкалданул сиптачитурайн ва автортурайн барчаллагьрайсса махъру чичлан бивкIуна. ЧIяву хьунни ттул дусталгу Аьрасатнал регионнайгу, кьатIаллил билаятирттайгу.

Медициналул университетрал ректор Сулайман Маммаевлул сипталийну скульпторнал МахIаммад НурмахIаммадовлул дурсса ва скульптура агьалинал дакIру гъан дуллалисса, пикрирдугу ца буллалисса давуну хьуну дур. Усттарну, магьирну дур­сса даврил тIилисингу, биялагу личIиссава бикIай.

Скульптуралул автор Ма­хIаммад Гъуниннал райондалиятусса ур, ванал нину мукь­цIалунниха лирчусса шиннардий Медуниверситетраву дарсру дихьлай дур. Арс МахIачгу Мединститутраву ряххилчинмур курсирай дуклай ур. Коронавирусрал азар сукку шайхтура, ва МахIачкъалаллал азарханалий «ятIул зоналий» зун лавгун ур. Дежурствалия увкIсса арсгу ичIува щяивтун, ванах уруглай, зий ивкIун ур МахIаммад скульптуралуха.

«Ттун арснаву аьлтта чIалай дия нара скульптуралуву ккаккан дуван аьркинмур – къюву, уххаву, къащи», – тIий ур МахIаммад. Ванал чарил скульптуралуву абад дурсса къюву – му жулла цинявннал аьмсса къювур. Медициналул зузалтраха­сса хIурматри. ЛивтIуцириннал аьпари. МуницIухва ва жула цинявннал цашиврул, дусшиврул лишанни. Барчаллагьри Сулайман Маммаевлунгу, МахIаммадлунгу.

Барчаллагьри азарданул цIараву, хьхьу-кьини ччаннай бавцIуну, агьали ххассал буллай зий бивкIминнангу, зузиминнангу. Ларгсса шинал щавурдал аьш кьаритарчагу, даххана дунни ва дуллу дунияллухсса ябитавугу, цIакь бунни халкьуннаву дусшиврул гьанурдугу. Лахьхьин бунни уттинин кьиматрай къабивкIсса затир­ттал кьимат буллангу. ТачIавгу къадикIантIиссар дунияллий нахIушивручIан, хъиншивручIан, рахIму-цIимилучIан дирсса цичIар. ЦIусса шинавугу цIуллуну ккакканнав!