Декабрь зурул 23-нний Дагъусттаннал гуманитар институтрал ректор МахIаммад ХIажидадаев хьунаавкьунни журналистуращал. Ректорнал бувсунни шинал лажиндарай дурсса даврил хIасиллая ва ВУЗ-рал дачин дурсса проектирдая.

---

Мероприятие дайдихьлай, МахIаммад ХIажидадаевлул барчаллагь увкунни ВУЗ-рал даврия чичлай бивкIсса журналистурахь. Хъирив ванал бувсунни Гуманитар институтрал гьану бивзния шинмай зий бивкIсса каялувчитурал бувсса захIматрая ва шикку хьусса дахханашивурттая.

– ДГИ-рал ларгсса шинал 15 шинал юбилей кIицI ларгссар. ЧIирисса чIумул мутталий ВУЗ-раву дан бювхъуссар цикссагу давуртту. ХIакьинусса кьини Да­гъусттаннал Гуманитар институт бухлай бур Теологиялул направление дусса ва паччахIлугърал дипломру булайсса Аьрасатнал хьхьичIунсса 12 ВУЗ-рал сияхIравун. Му бакъассагу, ва направлениялий СКФО-рай цалчин бакалавриатрал ва Аьрасатнаву цалчин магистратуралул аккредитация дурссар Дагъусттаннал гуманитар институтрал, – увкунни МахIаммад ХIажидадаевлул.
Ректорнал бусаврийн бувну, жуятура нанисса шин, захIматсса пандемиялул тагьар дусса дунугу, цаппара иширттаву институтран даркьусса хьуну дур.

– Март зуруй карантин баян байхту, жун багьунни анавархъиндарай кIулшивуртту дулаврил процесс баххана бан ва графикрай дан ккаккан дурну диркIсса мероприятияртту, форумру, конференцияртту махъун дичин. Буруккинттарай бивкIру, хьунавав ми дузрайн дуккан даннагу тIий.
Август зуруй байбивхьуру ми мероприятияртту дуллай, цанчирчан вайннувух студентътурал гьурттушинна чара бакъа дан багьлай бивкIун тIий. Ци чулийгу, жуща бювхъунни цинярда давуртту лавайсса даражалий дан.

Дагъусттаннал Миллатирттал политикалул ва диндалул иширттал министерствалущалсса хIала-гьурттусса давурттавугу хьунни кIицI лагансса ккаккияртту. Жу гьуртту хьуру Миллатирттал политикалул министерствалул сакин дурсса личIи-личIисса мероприятиярттай — VII-мур Диндалул дянивсса форумрай, «ЯхI-намусрал мусил кьанунну» тIисса конкурсрай, Ухссавнил Ккавкказуллал бусурмантурал конгрессрай, «Миллатру чIявуссар — Ватан цар дусса» тIисса конкурсрай, – увкунни МахIаммад ХIажидадаевлул.

2020 шинал Дагъусттаннал гуманитар институт кьамул бувну бур Теологиялул элмийсса кIулшивуртту дулаврил ассоциациялувун. ХIакьинусса кьини ва ассоциациялувун бухлай бур Аьрасатнал исламрал институт, Болгарнал исламрал академия ва утти миннувух ДГИ-гу.

– Ва институтрал оьрмулуву хьусса агьамсса иширан ккалли буллай ура. Цанчирчан, лавай­сса даражалул теологтал хIадур баншиврул цинярда конфессиярдал гьурттушивугу дикIан аьркинну тIий. Гьашину жу цалчинни магистрантътал хIадур бай­сса программалувух диндалул конфессиярттал вакилтал хIала бувсса, – увкунни МахIаммад ХIажидадаевлул.

Дагъусттаннал гуманитар институтрал кьутIирду дурну дур «Теология» лахьхьаврил направление дургьусса Аьрасатнал хьхьичIунсса ВУЗ-ирдащалгу. Мукунна, гьарта-гьарзасса кьутIи чирчуну дур Аьрасатнал ПрезидентначIасса Аьрасатнал шяраваллил хозяйствалул ва паччахIлугърал къуллугърал академиялущал, Аьрасатнал востоковедениялул элмурдал академиялул институтращал ва Дагъус­ттаннал паччахIлугърал университетращал. Вайннул лагрулий, кIицI лавгсса элмийсса идарарттай хIадур буллан тIий бур журналистал, дачин дан тIий бур хIала-гьурттусса кIулшивуртту дулаврил проектру.

Дагъусттан цалчинни гьуртту хьусса дунияллул халкьуннал жагьилтурал дянивсса «I remember» тIисса проектраву. Шикку гьуртту хьуссар Дагъусттаннал гуманитар институтрал студентътал – Шяъбан МахIаммадов, Аьйшат АьбдуллатIипова, Саида Жаватханова, Аьбдуссалам Хизриев ва Саидапанни Оьмаров. Студентътурал бувссар шикку Буттал КIанттул цIанийсса дяъвилиясса ахттаршиннардаясса докладру. Вайннал докладру кьамул бувну буссар «Collecting memories» тIисса семинардал программалувун. Утти вай студентътал гьан­тIиссар Германнавун проектрал хъиривмур бутIуву гьуртту хьун.

ВУЗ-рал дурсса даврил хIа­силлу дуллай, МахIаммад ХIажидадаевлул кIицI лавгунни цIанасса ппурттуву Гуманитар институт хIадур хъанай бушиву диндалул кIулшивуртту дулаврил идарарттансса элмийсса ва методикалул база сакин бавриха ва даврил опыт кIибачIавриха.
Ахирданий ректорнал жавабру дуллунни журналистурал суаллахьхьун ва ВУЗ-рал давривух чялишсса гьурттушинна дуллай бивкIсса СМИ-дал редакциярттан буллунни барчаллагьрал чагъарду.