Ларгсса нюжмардий Р. ХIамзатовлул цIанийсса Национал библиотекалул конференц-залдануву хьунни Дагъусттаннал халкьуннал шаэр Ссугъури Увайсовлул юбилейран хас дурсса батIаву. Шаэр, художник, журналист, педагог Увайсовлул оьрмулул 85 шинал юбилей барча дан ва кьини бувкIун бия мадарасса инсантал. БучIан ччай, бучIан къавхьуссагу къачанъя.
Юбилейрал мажлис бачин бувну ия ДР-лул Чичултрал союзрал Лакралмур секциялул вакил Илияс МахIаммадов. Ванал Дагъусттаннал Чичултрал союзрал цIания, Аьрасатнал Чичултрал союзрал председательнал цалчинма секретарь Геннадий Ивановлул чулуха барча увунни юбиляр, кIицI лавгунни юбилярнан АьФ-лул Чичултрал союзрал чулухасса ХIурматрал грамота ва А.С. Пушкиннул медаль дулунтIишиву.
Гихунмай махъру лавхъуна цал цIардугу, давурттугу машгьурсса инсантурал: Ххазина Аминовал, Хан Башировлул, Хизри Илиясовлул, Ибрагьина ХIасановлул, МахIаммадаьли Аьлиевлул, Гульшан Хасаевал, АьбдурахIман МахIаммадовлул, Магьди МахIаммадовлул, Рамазан Фаталиевлул, Сарат Жабраиловал, Асият Буттаевал-Пикьиевал, Космина Исрапиловал, Давди Увайсовлул, ТIалхIат АьбдурахIмановлул, Мурад Къажлаевлул школалул вакил Аминат Исяевал, Чапаево шяраваллил школалул директор Камил АхIмадовлул, лакку мазрал учительтурал цIания ПатIимат Аьлиевал ва мукунма цайминналгу.
Ихтилатру буллалими ва кьини, ца зумату кунма, кIицI лаглай бия Ссугъури Увайсов чIявусса гьунарду цавун цачIун хьусса инсан ушиву.
Шаэр оьрчIниява, жагьилниява шинай кIулминнал, ацIрахъул шиннардий ванащал дусшиву дуллалиминнал, ванал гъан-маччаминнал бусанмургу къачансса бия, оьрчIнийсса, чIаванийсса шинну дакIнийн дичлай.
Ва кьини микрофон канил бувгьуми чIурчIав дуллай бия уссурвал Увайсовхъан тIабиаьтралва мяш дакъа буллусса гьунардай: Ссугъури – Дагъусттаннал халкьуннал шаэр, ПаччахIлугърал премиялул лауреат, художник; Увайс (аьпа биву) – машгьурсса журналист-публицист, улчалахьхьу, Дагъусттаннал адабиятрал лайкь хьусса зузала; Башир (аьпа биву) – Аьрасатнал ва Дагъусттаннал лайкь хьусса художник.
Юбиляр барча уллай, мунан хасну цалва чивчусса шеърирду ва кьини бувккуна Илияс МахIаммадовлул, Космина Исрапиловал, Камил АхIмадовлул. Музыкалул бахшишран юбилярнан цалва балайрду увкуна Жанна Кьурбановал, Лакрал театрданул артистал Луиза Шагьдиловал, Рамил КьурбанмахIаммадовлул. ПатIимат Давидовал дурккуна назму, макьан руцаврийнусса бахшиш дурна Рамазан Фаталиевлул.
Официал бутIа къуртал хьуну махъ гихуннайсса батIаву хьуна барачатсса ссупралухгу.
