Азарданущал талай ливтIуминнал аьпалул музей

ЦIушинал бухкIуллий МахIачкъалаллал 22-мур лицейраву тIивтIунни COVID-19 азарданущал талай жанну дуллусса МахIачкъала шагьрулул хIакинтурал аьпалул музей.
Микку гьуртту хьунни МахIачкъала шагьрулул мэр Салман Дадаев, Шагьрулул Мажлисрал хъунама Морис Илиясов, Дагъусттаннал паччахIлугърал медуниверситетрал проректор МахIаммад ХIамидов, МахIачкъала шагьрулул 1-мур азарханалул хъунама хIакиннал хъиривчу МахIаммад СайгидахIмадов ва ливтIуминнал гъан-маччами.

Музейрал экспозициялувун духлай дур 400-нния лирчусса экспонатру – хIакинтурал суратру, гайннал элмийсса давуртту, «ятIул зоналий» зий бивкIсса хIаллай мачча-гъанцириннал чивчусса чагъарду ва дуклаки оьрчIал дирхьусса суратру.

Музей тIитIинсса сиптачи хьуну ур МахIачкъала шагьрулул кIулшиву дулаврил управлениялул каялувчи Вадим Дибияев.
Музей бан хасну ва школа циван язи бувгьуссар чирча, МахIачкъалаллал 22-мур лицей бур медико-биологиялул профилданийх нанисса дуккаврил идара.
Музей тIитIин дуклаки оьрчIал дурну дур хъуннасса даву – бивну бур хIакинтал зий бивкIсса медициналул идарарттайн, кулпатирттачIан, хIадур бувну бур докладру.
Музейраву бивхьуну бур чIявусса документру цаймигу. Экспозиция ялу-ялун салкьи хъанан тIий бусса бур гихунмайгу.

Экспозициялий агьаммур кIанттай бур коронавирусрал инфекциялул ливтIусса медициналул зузалтрал цIарду чирчусса «Аьпалул чIира». Ганийн тIайлану дирхьуну дур оьрчIал суратру ва барчаллагьрал чагъарду. Дур оьрчIал цала карунних дурсса давуртту – «ятIул зона» ва реанимациялул отделениялул къалип. Мероприятие наниссаксса хIаллай скрипкалий руцлай бия пашмансса макьан. ОьрчIал ккаккан бунни «ятIул зоналий» зузисса хIакинтурал оьрмулувасса сценарий.

Экспозиция ххал бувну махъ, Салман Дадаевлул барчаллагь увкунни медико-биологиялул лицейрал каялувчитурахь, гьарца шинал ва лицейрал медициналул гьану бусса оьрчIру итабакьлай бушиврий чIурчIавгу дурну.
Хъювсулгу увккун, шагьрулул бакIчинал жижара бунни лавмартсса азарданущал талай ливтIусса хIакинтурал гъан-маччаминнахь.
– ХIакьину дунияллий хъанахъимур асар хьуминнанни бувчIлачIисса инсаннал цIуллушивручIан дучIайсса цичIар дакъашиву. Ссавургу, кьуватгу булуннав, цала оьрмулунсса нигьачIаврих къабурувгун, хIакьинугу «ятIул зонардай» жула ватанлувтурал оьрмурду ххассал буллалиминнан. Жул цIуллушиву зул кIунттихьри дусса! Лицейраву тарбия хъанахъиминнал бувсса захIматрал жува дакI дацIан буллалиссару цайминнал оьрмурду ххассал баврил цIаний жанну дуллуминнал цIарду абадлий личIантIишиврий, – увкунни Салман Дадаевлул.