МахIачкъалалив, ятинсса ва нитти-буттал кьабивтсса оьрчIру бусса школа-интернатрал хIаятраву, Росгвардиялул зузалтрал бувгьунни мурхьру. Ва акция дунни Совет Союзрал ва Аьрасатнал Вирттаврал цIарду ларсъсса дагъусттанлувтуран хасну.
«Ястреб» тIисса Росгвардиялул СОБР-данул зузалтрал интернатрал оьрчIащал архIал бувгьунни 17 кIялагьилул гьаннарал мурхь. Гьарица мурхьирал чIарав цIакь дунни Аьрасатнал Виричунал цIа лайкь дурсса Росгвардиялул ва МВД-лул региондалул управлениярттал зузалтрал, мукунна Совет Союзрал Вирттаврал суратру.
– Ва акция дан жун ччан бивкIунни Ватандалул Вирттаврал кьини. Акциялул мурад бур жула жагьилтал, ялун нанисса ник Ватан ххирану тарбия даву. Миннан кIулну бикIан аьркинссар ва пахру бикIан аьркинссар дакьаврил цIаний, жула бучIантIимунил цIаний цала жаннай ва цIуллушиврий хIайп къаувкусса Вирттаврал цIарду. Гьарица мурхьирацIун цIакь бантIиссар вайннуха къайгъу буллансса интернатрал оьрчIал группарду, – увкунни школа-интернатрал директор Малик ХIажиевлул.
«Ястреб» СОБР-ал командирнал бигарду чIумуйсса бартбигьлагьисса полициялул подполковник АхIмад АхIмадовлул барчаллагь увкунни интернатрал каялувчитурахь цила чIумал дурсса ххаллилсса акциялухлу.
–ТIааьнну бур укунсса аллея жула аякьалийн лавсъсса идаралий баву. Жу гъирарай гьуртту хьуру ва акциялуву, цанчирча жул кьюкьравугу чансса бакъар Вирттаврал цIа лайкь дурсса къучагътал. ХIайп, миннал чIявуминнал ларсунни ва бюхттулсса цIа аьпалул хьуну махъ. Интернатрал каялувчитурал хъуннасса даву дуллай бур, шиккусса оьрчIру Ватан ххирану тарбия бан, вайннан жула Вирттаврая кIулну бикIан. Жугу хIадурссару интернатран жущава шайсса кумаг буллан, — увкунни Росгвардиялул хIаписарнал.
