Ттун цакьнивагу ва иш хIисав хьуна, амма вания ихтилат бансса гьуз учаву хьунни уттигъанну. Чаннах арцу дулун авцIуну унува, ялун бувкIсса ца хъамитайпалул ччаннавун дуртсса, коронавирусрая мугъаят хьуншиврул лаххайсса маска ккаккан дуруна ттун.
Гьай-гьай, ттун гацIана бувчIуна гай экьидичлан къабучIишиву. Гайннуйрихха бикIайсса азардал микробру. Ми маскарду чара бакъа ччуччин аьркиншиврия буслай бур телевизордавухгу. Мукунна азарханардай, поликлиникарттай ишла дурсса медициналул ххиличIлурду ччуччин аьркиншивриягу буслай бурхха. Вана ялун личавай цамургу «цIуцIаву». Цавай буссар, цалла жанная кьисас ласлай, жува хъин буллай хьхьу-кьини къакуну, жува тIурча, му цIуцIаву къадирнайнгу дияншиврул, маскарду ччи-ччинийн экьидичлай буру. Гьич ва иш къатIайлар.
