МахIаммадхIажи Маккуев, Республикалул Ветерантурал-педагогтурал ва насихIатчитурал советрал председатель:
– Ларгсса нюжмар ттун дакIний лирчIунни Республикалул Халкьуннал творчествалул къатлуву хьусса «Добрых рук творенье» тIисса, гьунар бусса художник, Ваччиял шяравасса Ибрагьим Ссунгъуровлул выставкалийну.

ТIайламур бусан, махъсса ппурттуву, коронавирусрацIун дархIусса тагьар сакин шаврийн бувну, буруккинттарай уссияв ванал выставкалун дайшишру къашайссания тIий. Ва ххуллух цукун-бунугу тIайлабацIу хьунни. Ссунгъуровлул творчество ххуйну кIулсса цинявппагу гьалмахтал хъунмасса хIаллай ялугьлай буссия ванал цала гьунар цайминнангу аьч буваннин.

Республикалул Халкьуннал творчествалул къатлуву хьу­сса выставкалийгу на цалчинна хьусса. ДакIниву ливчIунни хъинну тIааьнсса асарду.
Ибрагьим Ссунгъуров ур, мяйжаннугу, ляличIисса гьунарданул заллу. Выставкалий дия Ибрагьимлул тIаннуя, мурхьирдал мархрая, кьяртая дурсса караматсса скульптурарду ва суратру. Ванал искусствалул хатI щихакIуй къалавхьхьусса бур. Ибрагьимлул кIунттила дурксса давурттайну исват хъанай бия ва мастергу, художникгу, строительгу ушиву.

Выставкалийн бувкIсса бусравсса хъамаллуралгу лавай­сса кьимат бивщунни ванал захI­матран. ДакIнийхтуну барчаллагь тIий буру Ибрагьим Ссунгъуровлул выставка лавайсса даражалий сакин дурсса Республикалул Халкьуннал творчествалул къатлул директор Марита МухIадовахь.