Граждан обществалул ва инсаннал ихтиярдал советрал батIаврий

Граждан обществалул ва инсаннал ихтиярдал советрал батIаврий

Республикалул каялувчи Сергей Меликовлул каялувшиврий ноябрьданул 24-нний хьунни ДР-лул БакIчиначIасса Граждан обществалул ва инсаннал ихтиярдал советрал батIаву.


Сергей Меликовлул тIи­мунийну, жяматирттал идарар­ттал вакилтуращалсса хьунабакьавуртту дуллантIиссар гьарца зуруй. Республикалул каялувчинал бувсунни Совет сакин баврил мурадрал хIакъираву.

– Жяматийсса давуртту канилух дуккаврийну зуща бюхъантIиссар дузал буван чIявусса масъалартту ва инсантуран буллан бунияласса кумаг, – кунни Дагъусттаннал БакIчинал.
Мунил ахирмураднугу хъанахъиссар, ванал бувсмунийн бувну, агьалинал маэшат ххуй-хъин баву.

Мунияту хъуннасса агьамшиву дуссар инсантурал цалва пикри-зикрирду бусаврил.
Граждан обществалул республикалийсса тагьардания, инсаннал ихтиярду дуруччаврил иширттаяту бувсунни Советрал председатель Зикрулла Илиясовлул. Мунал тIимунийну, республикалий инсаннал ихтиярду дуруччаврил тагьар цалий дарцIуну дур.

Советрайн бучIайсса бур инсантурал чагъарду ва лабизавуртту личIи-личIисса ма­съаларттал хIакъираву. Миннувату яла агьамми бусса бур электричествалул, газрал дузал баврицIун бавхIусса, медициналул хIаллихшиннардая рязи бакъашиврул хIакъиравусса ва дарурттал багьри лахъ шав­рицIунсса.

Ми масъалартту чулийн буккан баврил хIакъиравусса бувчIин баву дурунни Дагъус­ттаннал БакIчинал.
БатIаврий ххал бивгьунни мукунма учительтурал харжирдал хIакъиравусса ма­съа­лагу. Сергей Меликовлул тIимунийну, ялун нанимур шинал бюджетрал зузалтрал харжирдал хIакъиравусса масъала ххал бигьинтIий бур цания ца батIаврий.

БатIаврий ххал бивгьунни мукунма ятинну ливчIсса оьрчI-бакI къатрал дузал баврил, коронавирусрал инфекция ппив шаврил хIакъиравусса масъаларттугу.

Читайте также: