Гьар шинах декабрьданул 22-нний кIицI лагайссар Энергетиктурал кьини. Дагъусттаннал энергетикалул арагу, ца Ухссавнил Ккавкказуллай дакъа, щалвагу билаятрай сий дусса, жула энергетикалул пишакартал бусравну кIицI лагайсса ара хъанахъиссар. Пишакартурал бяст-ччаллаву бикIу, жаваблувсса мурадру бартбигьлагьисса регионнал дянивсса турнирдай бикIу, жула энергетиктал хьхьичIунсса кIанттурдан лайкь къавхьуну, бахшишру къаларсун зана къашайссар. Ва пишакартурал кьинилун хасну бусан ччай бур, Дагъусттаннал энергетиктурал ккураннаву акъа, республикалул кьатIувгу бусравну хьунаакьайсса, ГьунчIукьатIрал шяраватусса, АьФ-лул лайкь хьусса энергетик, Аьлиев АхIмад Расуллул арсная. Декабрьданул 1-нний ванан там хьуссар оьрмулул 60 шингу.

---

Увну ур АхIмад Лакрал райондалий, хIурматрай цIа зумух ласайсса диркIсса Хъун дяъвилул ветеран Аьлиев Расуллул ва Халункачардул кулпатраву. Ва акъасса, вайннал кулпатраву ялагу кIия арс ва шанма душ бивкIун бур. Дяъвилий хьусса контузия сававну, шиная шинайн яруннан чани чан хъанай, архIала мурчIи хьуну ивкIнугу, Расуллул, Лакрал райондалий цалчин ГьунчIукьатIрал колхозрал найрду бувну, 1978 шинайннин миннуха къуллугъ буллай, зий-занай, захIмат бивхьуну бур. АхIмадлул ва ванал уссур­ваврал оьрчIшивугу ларгун дур мушакъатсса буттал «яру» хьуну, хъунмурчIин найрдаха зий, буттал бува увкумур буллай. Ва цувагу Шяраваллил хозяйствалул техникум бувккусса, найрдучинал кIулшивурттугу ларсъсса зузала ивкIун ур. Халункачаргу, оьрмулухун колхозрал давур­ттайгу зий, ряхва оьрчIахагу, мушакъатсса ласнахагу аякьа дуллай, къатта-къуш бачин був­сса зунттал хъамитайпа бивкIун бур. Укун хъунмасса захIмат-жапа бувсса, оьрмулул язими дуцинну хьхьичI ххуттай диркIсса кулпатраву тарбия хьусса чув ур АхIмад.

ГьунчIукьатIув 8 класс къуртал бувсса ппурттуву ливчIми кIива класс къуртал бан хъунама уссил увцуну ур Туркманнавун. Тикку институт къуртал бувсса ва вузрал каялувчитурал энергетикну зун гьан увну ур. Школагу къуртал бувну, АхIмад дуклан увххун ур Ростовуллал областьрайсса Зерноград тIисса шагьрулий Азово-Черноморскаллал механизациялул ва электрофикациялул институтравун.Тичча зана хьуну, Туркманнаву 3 шин дурну дур цIубакIрай электромонтерну, яла инженерну ва хъиривгу участокрал хъунаману зий. Уссу Дагъусттаннайн лавгун, цаппара хIаллава АхIмадгу ватандалийн зана хьуну ур. Пишакаршиврул кIулшивурттугу, даврил опытгу бусса жагьилсса пишакар най уна зун увцуну ур Тарумовкаллал райондалийсса Затеречный электросетирдайн. 1986 шиная 2008 шинайннин зий, АхIмадлул ккаккан бувну бур цува ци даража-кашилул зузала уссарив. Мастернал пишалия айивхьуну, Тарумовкаллал райондалул электросетирдал хъунаману итанцIа, 20-хъул шинну хьуну дур ца кIанай зий. Билаят­рал электроэнергиялул аралуву А.Чубайслул дуллай сукку хьу­сса «цIушиннардил» ппурттуву, «Дагэнерго» личIи-личIисса предприятиярдайх бачIлан бивкIукун, АхIмадлуйн, ххуйсса пишакар хIисаврай, оьвкуну бур зун МахIачкъалалив цIуну тIивтIусса «Энергострой» тIисса предприятиялийн. Мунил каялувчинугу зий ивкIун ур, жуна чIявучин кIулсса ва хIурмат бусса, Ххутрал шяраватусса Халилов Аьбдулхаликь Аьлил арс.

Микку АхIмад зун ивкIун ур цал участокрал хъунаману, яла предприятиялул хъунаманал хъиривчуну. «Энергостройрал» пишакартурал даврил опытрая бавну, вайннайн билаят­рал чIявусса шагьрурдал подстанциярду, лахъи­сса манзиллайх ттукIрал ххаллу дуцинсса давуртту тапшур дай­сса диркIун дур. Дяъвилул гьарзат щях дирхьуну диркIсса Чачаннал Республикалий вайннал, 2011 шинал байбивхьуну, бувну, ца чулийн буккан був­ссар Ухссавнил Ккавкказуллай ца хьхьичIунсса уттизаманнул «Грозный 330» тIисса подстанция. Мунил проектрал хъунаману зий ивкIун ур АхIмад. «Энергостройрал» бивкIун бур проектру дайсса 3 институт. Шикку зий бивкIун бур, строительтурая, электромонтертурая, геодезистурая сакин хьу­сса, ттуршаксса инсан усса коллектив. Проектрал бакI дургьуну, АхIмадлул каялувшиврулу мукунма бувну бур Къумтуркъалаллал райондалийсса Пюрундалул заводрансса 110 киловатт бусса подстанция.

Мукунма вайннал, гьанулуцIа байбивхьуну, цIулаган бувну бур Липецкалийсса 500 киловаттрал подстанция. Подстанциярду бувну бур Аьрасатнал цайми шагьрурдайгу – Ногинскалий, Дороховалий ва цайми кIанттурдайгу. «Энергостройрал» пишакартурал бригада АхIмадлул каялувшиврулу гьуртту хьуну бур Къарачай-Чаргаснавусса Архызрай най диркIсса агьамсса, «искусственный снижение» тIисса система дуллай бивкIсса проектравухгу.

ЦIана АхIмад жулла республикалий ПАО «Россети» тIисса Москавуллал организациялул тIивтIусса «Центр технического заказчика» тIисса предприятиялул каялувчинал хъиривчуну зий ур. АхIмадлул бусаврийну, вай цIана зий байбивхьуну бусса бур щалла республикалул циняр районнайсса ва шагьрурдайсса ттукIрал хозяйство ххал дигьавриха, ттукIрал ххаллал, тталлал, счетчикирттал ва подстанциярдал тагьар ххал давриха. «Программа по снижению потерь» тIисса проектрал лагрулий жулла республикалий 9 миллиард арцунсса давуртту дантIий бу­сса бур. Ялун нанисса шинал щурущи дантIиссар шагьрурдай ва щархъаву ттукIрал ххаллу, тталлу баххана буллали­сса, подстанциярду хъуни буллалисса ва цIубуккан буллали­сса давуртту.
АхIмад акъасса, энергетиктал вайннал кулпатраву ялагу чансса бакъар. Ванал чIивима уссу ва ссурвалгу зий бусса бур Тарумовкаллал РЭС-рай. Оьр­мулул 30-хъул шинну цала язи бувгьусса пишалун хас дурсса АхIмад, чув, ци къуллугъ тапшур бувну бивкIнугу, зий ивкIун ур буттал цахьва байсса бивкIсса насихIатругу дакIнийну, лажин кIялану, лагма-ялттуначIа бусравну ва хIурматрай. Лайкь хьуну ур каялувчитурал чулуха чIярусса хIурматрал грамотардан ва барчаллагьрал ча­гъардангу.
Ванал цала кулпат Марияннущал, тарбиягу бувну, чивун буккан бувну бур кIия арс ва ца душ. Буттан цIа дирзсса Расул ва душ Сабина бур ишбажаранчитал, чIивима арс Загьидинал, буттая эбрат ларсун, тава Ростовуллал областьрай­сса Электро­фикациялул институтгу къуртал бувну, зий ур цIана «Дагэнерголий». Кулпат Мариян зий бур Тарумовкаллал Пенсионный фондрай. АхIмад ур мукьва оьрчIал оьрчIал тта­ттагу.
Оьрмулул 60 шинал юбилейгу, ялун нанисса пишакаршиврул байрангу барча дуллай, чIа учин ччай бур АхIмадлун ва ванал даврил уртакьтуран ла­хъисса оьрмулийсса цIуллушиву, давриву тIайлабацIу ва каши-кьудрат.