Шинал мутталий данмур – зурул лажиндарай

Пандемия сававну, жува чIявусса иширттая махIрум хьуну бивкIру. Мукунма театрдаягу, хIатта ми онлайн кьаралданий зий бивкIун бухьурчагу.
Ссуссукьушиннарду куклу дарчагу, къаанавар буклай бия паччахIлугърал хъуними театрду тIитIин. Сайки урчIва барз хьунни театрдал нузру тамашачитуран ларкьуну.
Ноябрь зурул ахирданий буллунни паччахIлугърал рухсат театрду тIитIинсса. Театрдал нузру тIиртIуния махъ дуниял цийнна цурда кIура даллай душиврийнсса вихшалагу ххи хьунни дакIниву, хIатта коронавирусрал къашавайми инттунияр чIявусса бухьурчагу. ТIиртIунни Лакрал театрданулгу цила нузру тамашачитуран, цалсса ттигу, так ттурша инсаннаяр ххисса итабакьлай ба­къахьурчагу.


Хъунмасса тIайлабацIулущал хьунни 85-мур сезондалулгу, аьмну гьашинусса шиналссагу цалчинсса премьера. Утти шин яла гьан ливчIсса ва ца зурул дянив театрданул коллективран багьлай бур шинал лажиндарай дан ккаккан дурну диркIсса давуртту дан, акъахьурча паччахIлугърал дирхьусса план биттур къархьуну личIан тIий дур.
«Тарс мютIи баву» премьералия мукьах нюжмардул дянив ккаккан бунни кIива премьера. Ми бур сайки 15-хъул шинал хьхьичI бивхьуну, тамашачитуран лап ххира хьуну бивкIсса, хъинну хIазсса комедияртту: сербнал драматург Мирослав Митровичлул «Хьхьудяризалсса хъямалашин» (таржума С. Хайдакьовлул, режиссер МахIаммад Сурхатилов) ва «Москавлиясса гьалмагъай» (режиссер Дагъусттаннал халкьуннал артист Аслан МахIаммадов).
ЦIу буккан бувсса кIивагу спектакль ххал буллалийни хIисав хьунни биялну жагьил хьуну бушиву жула театр вай махъсса шиннардил дянив. Гьунар бусса чIявусса артистал тарбия бунни сахIналул.

«Хьхьудяризалсса хъямалашин» спектакльдануву гьурттуну бур цинявппа жагьилсса бунугу, тамашачитуран итталун багьсса артистал: Дагъусттаннал лайкь хьусса артистка Зинаида Чавтараева, Ибрагьим Мусиев, ГИТИС къуртал бувсса КьурбанмахIаммад Шабанов, Малик Кьурбанов, Олеся Оьмарова. Спектакльдануву режиссернал ххи дурну дия къавтIавуртту. ХIакьинусса кьинилуцIун дакьин дурну дия ахир. Хъямалашиндарал ялув учIан увсса полициянал зузала (Малик Кьурбанов) уххай маскалуву ва канийн пурх учай­сса затращал, «Зул маскарду чуври ва нигьачIисса, аьратталсса тагьардануву баччи бакъулшиву дуну бикIан бучIиссарив? АьчIа ххюазарда къуруш», – тIий.
Артистал икрамрай тамашачитурал хьхьичIун буккайхту, дакIнийн багьунни ва спектакльдануву роллу дургьуну бивкIсса жула цIанихсса артистал, аьпа­лухьхьун лавгсса МахIаммад МахIаммадов ва Сяид Мусалаев.

«Москавлиясса гьалмагъай» спектакль хас бувну бия мунил цалчинсса режиссер СалихI Иманголовлул аьпалун. ДакI ххари хьунни 2006 шинал ва спектакльдануву роль дургьуну ивкIсса, ДГУ-рал актертал хIадур байсса факультетрал цалчинмур курсирал студент, Руслан Ларин, хьхьичIунну ГИТИС-гу къуртал бувну, тамансса шинну Москавуллал театрдаву зийгу дурну, аьзиз­сса театрданувунай зана хьуну, цала роль дугьлай ккаккайхту.

[dropcap]Ш[/dropcap]яраваллил оьрму кка­ккан буллалисса, маз бувчIин бигьасса, хъярчлийсса балайрду бусса спектакль тамашачитуран ххира хьуссия Дагъус­ттаннал халкьуннал артистътурал Аслан МахIаммадовлул, Шамсуттин Къаплановлул, Да­гъусттаннал лайкь хьусса артисткахъал Юлиана МахIаммадовал, ПатIимат Давыдовал магьирсса тIуркIулийну.
Спектакльдануву жагьилтурал роллу дургьуну бивкIсса артистал театрданува лавгун махъ, гайннан кIанттай лапва гьунар бусса артистал бучIаврилгу ххи буллай бур театрданул гьунттий­сса бучIантIимур бушиврийн­сса умуд.

Шин дайдишин лирчIсса кIира нюжмардул дянив ттигу ккаккан бан дакIний бур кIива премьера: «Хъунавшавуй, чуннайра» (Г. Хугаев) ва «ЧIаку гьанттайнсса», ЦIусса шинан хас дурсса программа.
ХIакьину тIурча, театрдануву хьунтIиссар Дагъусттаннал халкьуннал шаэр Салимат Кьурбановал 100 шинал юбилейран хас бувсса мажлис.