«Аьрасатгу, Дагъусттангу цIакь хьуну ччива»

«Аьрасатгу, Дагъусттангу цIакь хьуну ччива»

1.Цукунсса хьуна оьрчIний вийнма яла гужсса асар биян бувсса зат, иш?
–1961-ку шинал аьламравун Ю.А. Гагарин левхсса иш.

2.Цими никирайн дияннинсса кIулли вин вила ппухълуннал нясав? Буси яла архманал цIа.
– Ххюра ник кIулли. Жул Магьихъал тухумрал дайдихьу дурну дур Магьил.

3.Инсаннал хасиятраву винна яла ккарккун къа­ччимур лишан?
– Аьркин бакъана, инсантурая аьрзарду буллалаву.

4.Вила оьрмулуву яла алши бумур шин?
– Ттула ниттил ниттил цIа дирзсса душ ПатIима бувсса шин.

5.ВичIара циксса арцу хьукун дигьаларгун дикIанссия вил дакI?
– Машук зунттуксса мусил бакIу ччива – щалла дунияллийх бачIин. Му чIумал дигьалаганссия ттул дакI.

6.Инсаннал тахсирдавасса цумур тахсир хьунссия вища багъишла битан?
– Данна тIий къадурсса тIул, цайва бияла бакъа хьусса тахсир.

7.Бувагу къабитан?
– ТIайла бакъасса, цама инсан аски ансса кьасттирай дур­сса къел.

8. Ссан диял къашай вил чIун?
– Давуртту хьхьичIун дуклай, ттунма ччиссаксса луттирду буккинсса чIун диял къашай.

9. Бартлавгун ччисса вила шанма мурад?
– Дагъусттаннал мазурдиха­сса аякьа-къулагъас ххишала хьуну ччива. Жула лакрал, цала маз, цала аьдат-эбадатру духлаган къаритансса чаранну лявкъуну ччива. Ччива, хьхьичIра кунна, дуккаврил сий гьаз хьуну.
Дагъусттангу, Аьрасатгу цIакь хьуну, бюхттул хьуну ччива.

10.Вила оьрмулуву хъинну ххирасса кIантту бувгьусса шама инсаннал цIа (нину-ппу къахIисавну).
– Ттула ххаллилсса дустал Ширвани, МахIаммаджабир, Ризван, Бутта Исяев.

11. Винма ххуй бизайсса хъамитайпалул сурат?
– Инсаншиву, яхI-намус ва мяърипат дусса хъамитайпа.
Миллатгу, ниттил маз ва культурагу ххирасса, ми ябан хIарачат байсса, жула «Дараччи» клубрал президент, аьпа баннав цил, Мариян Чибиевна кунмасса хъами.

12.Вина кьамулсса чув-адаминал сурат?
– Хан Муртазяли, Муслим Даххаев кунмасса къучагътал. Гьалмахтал бангу, бугьангу кIулсса ттула гъанчу Сайпуллагь кунмасса арамтал.

13.Агарда бюхъайсса бивкIссания, инава ци кIанттай, ци чIумал увну ва ци билаятрай яхъанай ччива вин?
– Нава увсса 1946-ку шинал увну, ттула буттал шяраву Ккурклив, ТтурчIайнна зунттул яхъулу ялапар хъанай ччива.

15. Ссаяту бикIай вин яла хъунмур пахру?
– Итххявхсса, гьунар ххисса, къучагъсса ттула миллатрая.

16.Цукунсса дур вил виятурасса къарязишиву?
– Нава инсантуран мадарасса хъинбаларду бувнугу (бувхьунссар тIий ура), миннуяргу чIявусса бан къашаврия.

17. Яла къаххирамур дукра?
– Ччан къабикIай дукралийн къаххирасса, къаххуйсса тIун.

18. Яла ххирамур дук­ра?
– Пулав, дурма. Ттулва кулпат Анисатлул, ссил Миясатлул, уссил щарнил Саниятлул дурсса дукрарду ччиссар ттун.

19. Ссаятусса бикIай яла хъунмамур хIучI?
– Дунияллий дяъвирду къахьуннав, тIабиаьт гьалак дурксса, инсаннал бакIрачIан баларду буцинсса ишру къахьуннав тIун икIара.

20.Хьуссарив вил оьрмулуву винна инара ттинин багъишла ритан къахъанахъисса къел?
– Багъишла къаритансса къел къадурссар тачIав.

21.Лавгсса заманардавасса цIанихсса инсантуравасса цуманащал хьунаакьин ччива вин?
– А.С.Пушкиннущал, И. В. Сталиннущал. Хьунаакьин ччива мукуна буттауссу Шяпинащал ва буттауссу, шаэр, Аьбдулвагьаблущал.

22.Цукунсса бур, вил пикрилий, лакрал миллатрал яла хъунмур буруккин?
– Лакку маз хъамабитлатаву. Мазращал архIал чIярусса буттахъал аьдатру хъамаритлатаву. Ва Дагъусттаннал мюрщи миллатирттан хъуннасса нигьри.

23.Ци дахчилай дур хIакьину Дагъусттаннахун, цил аьнтIикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул.
– Тарбиялул даву лагь хъанахъаву шиная шинайн.


Ва номергу, «Илчилул» аьдатравун багьсса вай кутIа суалла­хьхьунсса Даниял Магьдиевлул жавабругу хIадур дуллалисса ппурттуву дакIний-мазрай бакъассия ванал хIакъиравусса ххишала бакъа пашмансса хавар ялун биянссар тIисса. Вагу, ялунсса цайми-цайми материаллугу жу дулун салкьи дуллай буссияв Даниял Магьдиев ниттил увну январь зурул 3-нний бартлаглагисса 75 шинал юбилейрайн.

М. Маннаровлущал

Банмур цамур къалякъайссар, жува ца тIий, ялувсса Зал цамур тIий лявкъусса чIумал.
Данияллул юбилейрайх бивщунни пашмансса чани, амма чани – цала кьабивтссагу, мунал чулухунмайсса жула дакIурдиватусса чанигу.


М. Даххаевлущал

Читайте также: