Вай гьантрай Москавлив Дагъусттаннал Постпредствалул сипталийну хьунни Совет Союзрал кIийла Виричу АхIмад-Хан Султаннул цIа уттарану ядувавриву биялсса бутIа бивхьуминнан наградартту дуллалисса шадлугъ.
Миккун бавтIцири Дагъусттан Республикалул БакIчинал буржру биттур буллалисса Сергей Меликовлул цIанияту барча бунни Постпреднал хъунаманал хъиривчу ХIамзат ХIамзатовлул. Ванал кIицI лавгунни Виричунал юбилейрацIун дархIусса тамансса шадлугъру хьушиву Дагъусттаннайгу, Къиримнавугу, Аьрасатнал регионнайгу ва ми шадлугъру лайкьсса даражалий тIайла дуккан хъунмасса захIмат бивхьушиву Виричунал цIанил ва гьунарданул кьимат бюхттулну ябуллалиминнал.
АхIмад-Хан Султаннул медаль дуллунни зувира шинай Виричунал оьрмулия бусласисса, чичлачисса журналистнан, М. Громовлул цIанийсса ЛИИ-рал сотрудник Андрей Симоновлун. АхIмад- Хан Султаннул арснал душнин Вероника Амет-Ханнун тIурча, дуллунни МахIачкъала ва Дарбант шагьрурдал ХIурматрал грамотартту. ДакIнийн бутанну, Ах1мад-Хан Султаннул кIиягу арс дунияллия лагайхту, илданийх цIа ларгсса ттаттал фамилия дирчIан къаритан, Вероникал ванал фамилия ларсъшиву. Ванилми арсурвавралгу ттаттал фамилия душиву, гьаннайсса, Жуковское шагьрулий Амет-Хан фамилия дусса АхIмад-Ханнул наслу бушиву.
