Жяматрал къайгъурду цала бакIрайн лавсунни

Вай гьантрай АьФ-лул Па­ччахIлугърал Думалул депутат Аьбдулмажид МахI­рамовлул ирглийсса аьрххи хьунни Агъуллал райондалийн. Райондалул администрациялул къатраву МахIрамов хьунаавкьунни хIакинтуращал, учительтуращал, депутатътуращал, шяраваллал администрациярттал бакIчитуращал ва жяматращал. Хьунабакьаврий ххал бивгьунни Агъуллал райондалийсса щархъал социал-экономика хьхьичIуннай даврил масъалартту: трансформатордал станцияртту баххана баврил, ттукIрал ххаллу даххана даврил, ххуллурду, ламурду бакьин ва цIубуккан баврил, газ буцаврил, щинал дузал баврил хIакъиравусса. МахIрамовлул кIицI лавгунни цинявппагу шикку гьаз бувсса масъалартту дузал баврил ялув ацIаву цала бакIрайн ласунтIишиву.

Коронавирусрал инфекция ппив шаврил чулуха Агъуллал райондалий, вайминнух бурувгун, ххуйсса тагьар дур. Къашавай хьуминнал сияхI хъуннасса дакъар. Инфекция ппив хьун къаритаву мурадрай, райондалул каялувчитурал хъуннасса даву дачин дурну бушиву чIалай бур.

Хъирив Аьбдулмажид МахI­рамовлул ххал бунни муниципал бюджетравасса арцуйну шяраву буллай байбивхьусса парк-сквер. Паркраву бур беседкарду, качеларду ва оьрчIру бялахъай­сса мурцIу.
Ххал бунни депутатнал Ппи­ппигъ ва Дулдуг шяраваллавусса дянивмур даражалул школартту цIухху-бусу бунни школарттай учительтал биялну буссарив, ци тагьар дуссарив компьютердал дузалшиндарал ялув.
Агъуллал жяматрах дурсса къулагъасрахлу райондалул администрациялул бакIчи Закир Каидовлул барчаллагь увкунни Аьбдулмажид МахIрамовлухь.