Декабрь зурул 1-нний АьФ-лул ПаччахIлугърал Думалул депутат Аьбдулмажид МахIрамовлул агьалинащалсса ирглийсса хьунабакьаву хьунни манзилданул режимрайсса.
Ва кьини депутатнал ххал бивгьусса масъаларттуну бия льготартту ва пособияртту бишаврил, къатта-къушлил шартIру къулай даврил, социал кумагирттал ва цаймигу иширттал хIакъиравусса.
Каспийскалий ялапар хъанахъисса Зайнаб Вагьабова оьвтIий бия оьрчIан дагьайсса украсса дукиялул хIакъираву. Ванил бусаврийн бувну, личIи-личIисса багьана-сававртту хьхьичIун ласлай, шинал лажиндарай вилттилиоьрчIан дулун ккаккан дурсса дукра къадуллай бусса бур. Ва масъалалул хIакъираву депутатнал Каспийскалийсса оьрчIал поликлиникалийн хъирив лаяву тIалав дуллалисса чагъар чивчунни.
Турали поселокрай ялапар хъанахъисса Анжела Шихаьлиева тавакъю буллай бия аьрщарал участокрансса ихтияр дусса документру щаллу бан кумаг баврил хIакъираву. Ванил бувсунни 1998-ку шинал къатри бувсса аьрщарал документру хIакьинусса кьинигу дузал бан хъанай бакъашиву. Анжелал лас хьхьичIава зий ивкIун ур МВД-лий, цувагу къуллугърал бурж биттур буллай оьрмулуцIа хьуну ур. Хъамитайпалул цилалу хъуни бувну бур шанма оьрчI. ЦIана ванин захIматну бур аьрщарал документру дузал бан. Аьбдулмажид МахIрамовлул ва масъала ххал бигьаву тIалав дуллалисса хасъсса чагъар чивчунни шагьрулул мэриялийн.
Буйнакскаллал райондалий ялапар хъанахъисса агьалинал цIания Мавлет Батиров оьвтIий ия Буйнакскаллал трассалия Ишкарта шяравун бияннинсса ххуллийх асфальт бутIаву программалийн ласунсса кумаг бува тIий. Ванал бувсунни кIицI лавгсса ххуллу, гъараллу ларчIун, марххала бувну махъ хъиннува зия хьуну, агьали цала къатта-къушличIан биян къахъанай личIайшиву. Ванил хIакъиравугу райондалул муниципалитетрайн хъирив лаяву тIалав дуллалисса аьрза чивчунни.
МахIачкъалалийн дагьайсса «Дзержинск» тIисса дачардал обществалий ялапар хъанахъисса Жабраил АьбдурахIманов оьвтIий ия, дияйнин дирсса трансформаторду дуну, ччя-ччяни чани лешлай, хIачIайсса щин, чIиви-хъунссавагу медпункт бакъа, шанма смена бусса школалий дуклан оьрчIру занай бушиву буслай.
Инсантурал кIицI лавгсса масъалартту дузал баврил хIакъиравугу хасъсса чагъар чивчунни МахIачкъала шагьрулул Ленинский райондалул администрациялийн.
Ва кьини, вай бакъассагу, цаймигу масъалартту ххал бивгьунни ва ми щаллу баврил ялув ацIаву бакIрайн лавсунни Аьбдулмажид МахIрамовлул.
Агьалинал масъаларттах вичIи дирхьуну махъ Аьбдулмажид МахIрамовлул АьФ-лул ПаччахIлугърал Думалул депутат ХIажимет Сапараьлиевлущал ххал бивгьунни Республикалул Кардиологиялул ва къюкIлил-сосудирттал хирургиялул центр. Центрданул директор ХIусман МахIачевлул бувсунни клиникалул даврия, шикку буллалисса операциярттая, Москавуллал хьхьичIунсса хIакинтуращалсса даврил опытрая ва чIалачIи дурсса ккаккиярттая.
ХIакинтуращал ихтилатру бувну махъ сукку бунни цIуллу-сагъшиврул масъалартту хьхьичIунмай баврил, медициналул кумагирттал даража гьаз баврил, ттизаманнул ларайсса технологияртту ишла даврил хIакъиравусса масъалартту.
