Утти «больничный» электрон журалийссагу тIитIин бюхъантIиссар

Ва нюжмардийсса итникьинилия тихуннай агьалинахьхьун ихтияр дуллуссар чагъарданул «больничный» дакъасса, электрон журалиймургу ласлан. Уттинин жува чагъарданулмур «больничный» ласун так паспорт булайсса бивкIхьурча, электрон журалиймур ласун паспортращал СНИЛС-гу аьркин хьунтIиссар.


ЦIусса низамрайн бувну, къашай-шай хьусса оьрчIах бурган, «больничныйгу» тIиртIуну, шаппа бацIан бучIину бур винма ччиссаксса. Амма миннува так 15 гьантта бур харж булун ккаккан бувсса. Агарда кулпатраву, масалдаран, циняв оьрчIру къашавай бухьурча, электрон журалийсса «больничный» тIитIинтIиссар цинявннан аьмну ца. Чагъарданулмур « больничный» дулунтIиссар кIива оьрчIан ца хIисавну, кIиннияр ххишаласса къашавай бухьурча, тIитIинтIиссар кIилчинмургу.

Агарда кулпатраву 3 шин къархьусса оьрчIах дуруглай, отпускалий нину духьурча, кIилчинмур оьрчI къашавай хьуний, буттангу, «больничныйгу» тIиртIуну, шава щяикIан бучIину бур.
Коронавирусрал азар ппив къашаву мурадрай, электрон журалул «больничный» тIитIин бучIиссар телемедициналул кумаграйнугу, шаппатува оьвкуну хIакинначIан.

«Больничныйрду» дулун ихтияр дуссар лицензия дусса циняв медициналул идарарттай зузи­сса хIакинтурахь, агьали хъин буллан ихтияр ду­сса, фельдшертурая тIайла хьуну, ккарччал хIакинтурайн бияннин. Му тIитIин ихтияр дакъа­ссар так «Анавар кумаграл» къуллугърай зузисса хIакинтурахь.